Иахьа зира Амш азгәазҭо, ԥыхьатәи аҟәатәи афабрика «Амодақәа Рыҩны» аусзуҩцәа ируаӡәку  Шьалуа Занҭариа убасҵәҟьа ари аиасра ихы алаирхәит. Уи «Аԥсныпресс» акорреспондент диҿцәажәо хаҭала абираҟ автор, асахьаҭыхыҩ Валери Гамгьиа  иескизқәа рыла Аҳәынҭқарратә бираҟ зӡахуаз рхыԥхьаӡараҿы дшыҟаз игәалаиршәеит.

Шьалуа Занҭариа Амодақәа Рыҩны аҿаԥхьа иқәгылаз аԥсуа бираҟ аӡахра азы ахыдҵа анагӡара шаҟа иуадаҩыз, уимоу ишәарҭаз аҭагылазаашьақәа рҿы имҩаԥысуаз атәы игәалаиршәет.

«Амодақәа Рыҩны» аҿы аусура шәрҭан, убри аҟнытә иҳаӡбеит амоделер Арда Аршаниа лыҩны уи аӡахра. Уаҟа Валери Гамгьиа иескизи ихылаԥшреи рыла иит абираҟ раԥхьатәи ахкқәа», – ҳәа еиҭеиҳәеит иара.

Ԥхынгәымза 23 рзы Аԥсны иазгәарҭоит Ареспублика Аԥсны Аҳәынҭқарратә бираҟ Амш. Сынтәа Ареспублиа Аԥсны Аҳәынҭқарратә бираҟ иахыҵуеит 32 шықәса.

Официалла Аҳәынҭқарратә бираҟ Амш Аԥсны иазгәарҭоит рашәарамза 3, 2005 шықәса раахыс. Усҟан Аҳәынҭқарра Ахада Сергеи Багаԥшь Жәлар Реизара-Апарламент аҿы ирыдыркылаз «Ареспублика Аԥсны агәалашәаратәи аныҳәамшқәеи рзы» Ареспублика Аԥсны азакәан аиҭакрақәеи ацҵақәеи ралагалара азы» азакәан инапы аҵаиҩит.  Убри амш инаркны ԥхынгәымза 23 Ареспублика Аԥсны Аҳәынҭқарратә бираҟ Амш ҳәа ирылаҳәоуп.