Аҟәа. Ԥхынгәымза 23, 2024 шықәса. Аԥсныпресс. Иахьа Черқесск ақалақь, акультуреи аԥсшьараамҭа ахгареи рпарк «Зелёный остров» аҿы Абаза ажәларқәа ркультура Амш азгәаҭара иазку аныҳәатә усмҩаԥгатәқәа мҩаԥысуеит.
Апарк аҵакыраҿы еиуеиԥшым аплошьадкақәа рҿы еиҿкаауп анапҟазацәа раалыҵ ацәыргақәҵақәа, абаза бызшәала аԥхьаҩцәа рконкурс мҩаԥысуеит ахәыҷқәа рзы аицлабра, иреиӷьу амилаҭтә костиум азы аконкурс, уҳәа убас иҵегьы.
Араҟа иара убас адгалара мҩаԥгоуп абаза жәлар рмилаҭтә чыс хкқәа, насгьы, жәаҳәарада, ареспублика ауааԥсыреи асасцәеи ирзыԥшуп жәлар рныҳәара, Ҟарачы-Черқесстәи Ареспубликеи Ареспублика Аԥсни рҟынтәи аҟыбаҩ злоу артистцәа рыла еиҿкаау аконцерт, уҳәа егьырҭ арлахҿыхратә усмҩаԥгатәқәа рацәаны, ҳәа адырра ҟанаҵоит агазеҭ «День республики».
Иқәгылараны иҟоуп Аминаҭ Напшева, Саида Габниеи ахәыҷтәы вокал-хореографиатә коллективи, Абзагә Ҵәыџьба, Вадим Тластанкулов, Авокал-инструменталтә ансамбль «Абазинка», афольклор-хореографиатә ансамбль «Нана», агәыԥқәа «Абазги», Валериа Перцхелиа, Ҟарачы-Черқессиатәи Ареспублика Аҳәынҭқарратә акәашара атеатр, Иракли Џьумутиа, Лиудмила Хужева, Наҭелла Ҷамба, Гәырами Инессеи Шеремтоваа, Мадина Мураткова напхгара зылҭо агармонрҳәаҩцәа рыквартет.
