Азакәан апроект аҿы иарбоуп аиҿкааратә уснагӡатәқәа зегьы. Ҳара апарт-отельқәа рыргылара алшара ҳалацәажәоит, анагӡаратә мчрақәа ракәзар, егьырҭ аспектқәа реиҿкаара рхахьы иргоит.  Ашәарҭарақәа зегьы ҳасаб рызуп. Азакәан апроект апартаментқәа раахәара атәылауаҩра аиура азин азԥхьагәанаҭаӡом ҳәа иарбазар, ҳара уи агәыҩбара ҳазцәырнамгозароуп.  Ари ҳара ҳзы ихадоу аргументны иҟоуп, уи инҭкааны иарбоуп аусшәҟәы аҿы.  Аҭыԥантәи ахадарақәа ҭыԥқәак рҿы аргыларазы азин ҟарымҵозар, уи иаанаго уаҟа аргыларақәа ҟалаӡом ҳәа ауп. Анхаратә закәанеидкыла аԥхьаҟа аргылара аԥҟарақәа шьақәнаргылалоит. Уаҳа иаҳҭахи нас ҳара?

Сара агәра ганы сыҟоуп — ари ажәалагала — аекономикатә ҿиара азы иреиӷьу авариантқәа иреиуоуп. Ҳара арегионқәа адгылара раҳҭароуп. Ҿырԥштәыс иаагозар — зеиӷьаҟам ала аҭыԥантәи аҭагылазаашьа атәы здыруа Очамчыра араион ахада иқәгылара. Ас еиԥш иҟоу аԥшьгарақәа адгылара аҭахуп. Сара схаҭа араион аҿы сынхоит, схаҭагьы избоит ауааи аинвестициақәеи разымхара шҳамоу.

Апартаментқәа азакәан ишьақәнаргыло амҽхакқәа ирҭагӡаны ианыргылахо ашьҭахь апрограмма хыркәшахоит. Иҟалар алшоит ари апроцесс аамҭа рацәа амҽханакыргьы, зегьы ишаадыруа еиԥш, апартаментқәа рыргылара зҭаху агәараан иқәгыланы иаабом. Ҭҟәарчал ақалақь аҿы, иаагозар, сара макьаназы апарт-отельқәа рыргылара иазхиоу ҳәа аӡәгьы дызбаӡом. Аха ус иҟоу аинвесторцәа цәырҵыр, усҟан урҭ ацхыраара рыҭатәхоит, иманшәалоу аҭагылазаашьақәа рзаԥҵатәхоит.  Адунеи зегьы аҿы аинвестициақәа ралагаларазы иманшәалоу аҭаглазаашьақәа аԥырҵоит, ҳаргьы убас иҟаҳҵалароуп.  

Шәааи хшыҩзышьҭрала ари азҵаара ҳазхәыцны ҳекономика аҿиара иахәаша аӡбамҭа иаша ҳадаҳкылап».

Ԥхынгәымза 11 рзы Жәлар Реизара-Апарламент аҿы имҩаԥысыз Апарламент адепутатцәеи араионқәеи ақалақьқәеи рхадацәеи реиԥылара рхы аладырхәит Аҳәынҭқарра Ахада Аслан Бжьаниа, Аҳәынҭқарра Ахада ихаҭыԥуаҩ Бадра Гәынба, атәыла аԥыза-министр Алеқсандр Анқәаб, Жәлар Реизара-Апарламент Аиҳабы Лаша Ашәба, Аконституциатә Ӡбарҭа ахантәаҩы Диана Ԥлиа, апрокурор Хада Адгәыр Агрба, Аҳәынҭқарра Ахада Иусбарҭа анапхгаҩы Абесалом  Кәарҷиа, Иреиҳаӡоу Аӡбарҭа ахантәаҩы Саида Быҭәба, Аҳәынҭқарратә шәарҭадара Ахеилак Амаӡаныҟәгаҩ  Сергеи Шамба, Аҳәынҭқарра Ахада Иусбарҭа анапхгаҩы ихаҭыԥуаҩ  Зураб Қаџьаиа, атәыла Анапхгара алахәылацәа.