Аҟәа. Ԥхынгәымза 18, 2024 шықәса. Аԥсныпресс. Атәылахьчара Аминистрра аҿы Урыстәылатәи Афедерациа иреиҳаӡоу арратә ҵараиурҭақәа рҭаларазы акандидатцәа адкыларатә ԥышәарақәа рҭиуеит. Урыстәыла атәылахьчара Аминистрра аҵараиурҭақәа рахь адкылара ҩ-етапкны имҩаԥысуеит.
Актәи аетап (заанаҵтәи алԥшаара) атәылахьчара Аминистрра аҿы имҩаԥысуеит, (аррамаҵурауаа рзы – архәҭақәа ркомандаҟаҵара).
Актәи аетап амҩаԥгараан акандидатцәа аконтракт ала арратә маҵзура иахысларц зҭаху атәылауаа рзы аҵарадырра аҩаӡара, ақәра, агәабзиара аҭагылазаашьа, азанааҭтә хәарҭахара, уҳәа рганахьала Аԥсны азакәанԥҵара ишьақәнаргыло аҭагылазаашьақәа иахьынӡарықәшәо аилкаара мҩаԥысуеит. Акандлидатцәа хыхь иарбоу аҭагылазаашьақәа рашьашәалара ашьақәыргылараан урҭ азанааҭтә алԥшаара ахь инашьҭхоит.
Аҩбатәи аетап (азанааҭтә алԥшаара) аҿы акандидатцәа иазԥхьагәаҭоу азанааҭқәа рыла иреиҳау аҵарадырра апрограммақәа рыла аҵара азы рылшара аҩаӡара шьақәыргылахоит.
Азанааҭтә алԥшаара иаҵанакуеит: акандидатцәа ргәабзиара аҭагылазааша зеиԥшроу ала Урыстәыла атәылахьчара Аминистрра аҵараиурҭа аҭаларазы иахьынӡақәшәо аилкаара, акандидатцәа рзанааҭтә хәарҭахара аилкаара, иара убас адкыларатә ԥышәақәа рыҭира (акандидатцәа рзеиԥшҵаратә ҩаӡареи рмаха-шьахатә зыҟаҵареи аилкаара).
Урыстәылатәи Афедерациа атәылахьчара Аминистрра аҵараиурҭақәа рахь адкылара мҩаԥысуеит аконкурс ашьаҭала.
