Ахада дазҵааит шаҟа усурҭатә ҭыԥ ҟало. "Апроцесс активла ацара иаҿуп. Иааидкыланы, иҳабжьаҳҵаз аилаӡара инақәыршәаны 250 ҭыԥ инеиҳаны иҟалар акәхоит. Апроектқәа азԥхьагәаҭоуп атранспорт-логистикатә усхк аҟны, ааглыхрақәа, иара убас анхарҭа ҭыԥқәа рыҟны», - иҳәеит анаплакҩы.
Аҳәынҭқарра Ахада иазгәеиҭеит иахьатәи аамҭазы Аԥсны аграртәи ақыҭанхамҩатәи секторқәа рыҟны акыр идуу ари апроект иамоу аҵакы.
Очамчыра Администрациа Ахада Беслан Бигәаа иазгәеиҭеит мрагыларатәи Аԥсназы ас еиԥш апроектқәа рынагӡара иамоу аҵакы, насгьы ас еиԥш иҟоу апроектқәа ари араион економикала ахы иақәиҭны аҟалара шалдыршо.
Аҳәынҭқарра Ахада иусуратә ныҟәарақәа ирылахәын Ахада Иусбарҭа анапхгаҩы Абесалом Кәарҷиа, уи ихаҭыԥуаҩ Зураб Қаџьаиа, аԥыза-министр актәи ихаҭыԥуаҩ, афымцамчи атранспорти рминистр Џьансыхә Нанба, аԥыза-министр, аекономика аминистр Кристина Озган, ақыҭанхамҩа аминистр Беслан Џьапуа.
