Аҳасабырбатә еизара аҿы дықәгыло афонд аԥҵаҩы Беслан Шакаиа иҳәеит:
«Гәык-ԥсыкала иҭабуп ҳәа расҳәар сҭахуп ари ашықәс иалагӡаы адгылара ҳазҭоз зегьы. Ҳара зегьы ҳамчи-ҳалшареи еизакны ацхыраара зҭаху ҳрыдгылоит, иара убри ала агәыҳалалратә хықәкқәа наҳагӡоит».
Беслан Шьакаиа афонд апроектқәа иуадаҩу аԥсҭазааратә ҭагылазаашьа зауз ахәыҷқәа ацхыраара рыҭара иазырхоуп ҳәа иазгәеиҭеит.
«Ҳара иаабоит ауаа рыԥсҭазаара абзиарахь аҽшеиҭанакуа., уи ҳара даараӡа ҳаргәырӷьоит, аусуура ацҵаразы агәазҭазаара ҳнаҭоит. Аиҳарак иазгәасҭарц сҭахуп хатәгәаԥхарала ҳацхырааҩцәа рлагала, ҳдонорцәа, ҳпартниорцәа иҟарҵо ацхыраара. Идуӡӡаны иҭабуп ҳәа шәасҳәоит!» - ҳәа иҳәеит иара.
Афонд анапхгаҩы, Аԥсны ахәыҷы изинқәа рыхьчаразы Азинмчы змоу Мактина Џьынџьалаԥҳа афонд жәларбжьаратәи ахырхарҭа ала аусура атәы дазааҭгылеит. Уи лажәақәа рыла, «Ашана» лассы-лассы аус рыцыруеит Урыстәылеи Ермантәылеи рҟынтәи аҳақьымцәа, урҭ рхыԥхьаӡараҿы иҟоуп атравматологцәа, ахирургцәа, ахәыҷтәы неврологцәа, апсихиатрцәа.
«Аԥсны Агәабзиарахьчара аминистрреи дареи еицымҩаԥырго апроект «Агәабзиара змоу абиԥара» аҵак ду амоуп. Иҳаҩсыз ашықәс хәажәкыреи нанҳәамзеи рзы апроект аҳәаақәа ирҭагӡаны аортопедтә-ҳақьым Овсеп Даниелиан 240-ҩык ахәыҷқәа дрыхәаԥшит, 15-ҩык ахәыҷқәа рзы апротезқәа ҿаҵан.
Жәабранмзеи нанҳәамзеи рзы Ахәыҷтәы анеирореабилитациатә центр «Импульс» аҟынтәи аҟазацәа 35-ҩык ахәыҷқәа гәарҭеит, урҭ рҟынтәи 8-ҩык ахәшәтәра идәықәҵан. Иазгәаҭатәуп, амедицина ахырхарҭала аҟазацәа Аԥсныҟа иааҳаԥхьаанӡа еиуеиԥшым аганқәа рыла аҭагылазаашьа гәаҳҭоит: иҭаҳҵаауеит иаҳа иаҳҭаху аҟазацәа, насгьы аҭаацәа иҟарҵо аҳәарақәа инарықәыршәаны иааҳԥхьоит", – ҳәа азгәалҭеит Џьынџьалԥҳа.
Аусмҩаԥгатә ахыркәшамҭаз Аԥсны амобилтә еимадара Аилазаарақәа рхаҭарнакцәа «згәы ҳалалу абонентцәа», иара убас афонд апартнирцәеи абзиаҟаҵаҩцәеи аџьшьара рыҭара мҩаԥыргеит. Саида Габниа напхгара зылҭо амузыкатә студиа аҵаҩцәа амузыкатә номер ала аизара хдыркәшеит.
Акультура-гәҳалалратә фонд «Ашана» икомерциатәым еиҿкаароуп, уи ацхыраара зҭаху ауааԥсыра адгылара рыҭареи, иара убас амилаҭ агәабзиара аиӷьтәреи еиҵагыло абиԥара рдоуҳатәи рлеишәатәи ҿиара аҩаӡара ашьҭыхреи аԥсуа жәлар ркультура аиқәырхареи иазырхоу еиуеиԥшым асоциалтә программақәа рынагӡареи хықәкыс иҟаҵаны 2008 шықәсазы иаԥиҵеит абизнесуаҩы Беслан Шьакаиа.
Афонд 12 шықәса аусура иалагӡаны 107,6 миллион мааҭ еизгоуп. 430-ҩык ахәыҷқәа рыхәшәтәразы 624 курс ахә ахшәаауп, 260-нтә агәыҳалалратә акциақәа мҩаԥган. Акыр шықәса инаиԥынкыланы афонд аинформациатә партниорцәаны иҟоуп: Аԥснытәи аҳәынҭқарратә телехәаԥшра, амультимедиатә информациатә Маҵзура «Sputnik-Аԥсны», Ателехәаԥшратә Еилазаара «Абаза-ТВ», амобилтә еимадара Аилазаарақәа «Аҟәафон», «А-Мобаил».
