Аинфраструктура иаҵанакуеит абылрацәыхьчаратә система, аԥхьаҟа ацитрустә аалыҵи ирлас ибжьысуа аидарақәеи Урыстәылаҟа рдәықәҵаразы.

Апроект аҳәаақәа ирҭагӡаны иаахәан зхала иныҟәоу акран «Zoomlion», 450 тонна аидара шьҭызхуа, ааигәа атәылахь иаашьҭын, иагьеибыҭан.

«Ари акран 300 контеинер зкуа аӷба ақәҵара алшоит. Иара убас иаахәоуп 45 тонна аидара шьҭызхуа», - ҳәа азгәеиҭеит адиректор ихаҭыԥуаҩ Октаи Хазирши.  Иара убас иҳәеит, аконтракт ала Китаинтәи дшааз  амашьынаргыларатә еилазаара анџьныр, аҭыԥантәи аспециалистцәа акран аусушьа дзырҵо.

Атерминал анапхгара ахаҭарнакцәа ҷыдала иаҵшьны иазгәарҭеит рҽеимаданы, ҳәоуеиқәшәарыла аусура иамоу аҵакы. Уахь иаҵанакуеит аидара амҩангареи еихамҩалеи мшынлеи аныҟәарақәа реимадара. «Акраҵанакуеит ари апроект комплексла азнеира, ҭыԥк мацара иадҳәаланы акәымкәа. Ҳара жәларбжьаратәи атранспорттә бжьысырҭа иахәҭакны иҟало аинфраструктура аԥаҳҵоит. Хықәкыс иҳамоуп Урыстәылантәи ахԥатәи атәылақәа рҟынӡа аидарақәа лассы рнагаразы ацәаҳәатә маҵзура аиҿкаара, аекспорт еиԥш аимпорт азгьы, - ҳәа иҳәеит Октаи Хазириши. – Ҳгәыӷуеит, Очамчыратәи абаӷәаза атранспорттә маршрутқәа рыҟны хадара злоу хәҭаны иҟалап ҳәа».

Саид Амҷба иажәақәа рыла, апроект қәҿиарала анагӡара мҩаԥысларц азы уи иалахәу зегьы ражәа еимаданы аус руроуп, Атранспорти афымцамчи рминистрреи, Аԥснытәи амшынтә ӷбаныҟәареи аԥснытәи аихамҩеи убрахь иналаҵаны. «Аклиентцәеи аилахәырақәа-аоператорцәеи ҳусура ахә ршьоит аусеицуреи атехнологиатә процесси реиҿкаара шҳалшо еиԥш.

Аҳәынҭқарра Ахада иаҵшьны иҳәеит Аԥсны аекономика арӷәӷәареи арегион алогистикатә лшарақәа реиӷьтәреи рзы аинфраструктуратә проектқәа ҷыдала ирымоу аҵакы атәы.

Аобиект аҟны аргыларатә усурақәа рхыркәшара азԥхьагәаҭоуп ҳазҭоу ашықәс нанҳәамзазы, аусура иалагалахоит цәыббрамзазы.

Аслан Бжьаниа иара убас абаӷәазахь инагоу автомашьынамҩа дахәаԥшны ибеит, аԥшаҳәа аӡы иамыӡәӡәарц ахьчаразы арӷәӷәара ахьаҭаху. Очамчыра араион ахада иажәақәа рыла, ари аҭыԥ аҟны амҩа ҵнаӡәӡәаауеит амшын ӡы. «Зынӡа 700 метра амҩа рӷәӷәатәхоит», - иҳәеит Б. Бигәаа.

Аҳәынҭқарра Ахада иусуратә ныҟәарақәа ирылахәын Администрациа Ахада Абесалом Кәарҷиа, уи ихаҭыԥуаҩ Зураб Қаџьаиа, аԥыза-министр актәи ихаҭыԥуаҩ, афымцамчи атранспорти рминистр Џьансыхә Нанба, аԥыза-министр, аекономика аминистр Кристина Озган, ақыҭанхамҩа аминистр Беслан Џьапуа.