Аҟәа. Ԥхынгәымза 11, 2024 шықәса. Аԥсныпресс. Аминистрцәа Реилазаара аҿы ишьақәырӷәӷәоуп 2024-2026 шықәсазтәи «Аԥсшәадырреи кавказдырреи рактуалтә зҵаарақәа рыӡбаразы» хықәкылатәи аҭҵаарадырра-техникатә программа.
Аминистрцәа реилазаара иаднакылаз ақәҵара инақәыршәаны, апрограмма анаукатәи аҵарадырратәи ахыдҵақәа ркомплекс амҽханакуеит.
Убас, аусдҵа хадақәа рхыԥхьаӡараҿы иҟоуп:
- инарҭбааны Аԥсны аҭоурых аҩразы ахыҵхырҭаҭҵааратә база аԥҵара иазкны Аԥсны аҭоурых аконцепциа аԥҵареи аҭыжьреи;
- Аԥсны еиуеиԥшым аамҭақәа ирыҵаркуа аҭоурых азы арҵагашәҟәқәа рышьақәыргылареи рҭыжьреи;
- антикатә аамҭахәҭа инаркны Аԥсны аҭоурыхи аԥсуа жәлар рдоуҳатә ҭынхеи рзы еиуеиԥшым абызшәақәа рыла ахыҵхырҭақа рыԥшаареи адәныҟатә материал аизгареи ралыршара;
- Аԥсуа бызшәа алексикатә фонд Амилаҭтә иԥхьаӡацу акорпус аԥҵара;
- Аԥсышәала иҭыжьыз акьыԥхьтә материалқәа зегьы рыԥхьаӡацыркреи, анаҩс урҭ анаукатәи ауаажәларра-хархәаратә еикәыршара ахь ралагалареи ;
- аԥсуаа итрадициатәу рҿырҳәалатәии рлаԥшылатәии акультурақәа рматериалқәа разырхиареи рҭыжьреи: аекспедициатә усурақәа рымҩаԥгара, аудио-видео нҵамҭақәа рҵакы аартра, афольклор аиқәыршәара аиҿкаареи аҭыжьреи.
Апрограмма алагалара аԥсуа жәлар рдоуҳатә ҭынха аиқәырхареи аԥсуа бызшәа амилаҭтә гәыцә шьаҭаны иҟаҵаны аԥсуа бызшәа инарҭбааны аларҵәаразы аҵаҵӷәқәа раԥҵареи инарҭбааны Аԥсны аҭоурых аҩразы ахыҵхырҭаҭҵааратә база аԥҵареи хықәкыс иамоуп.
Апрограмма адкылара амш инаркны ԥхынҷкәынмза 31, 2026 шықәса рҟынӡа аус аулоит.
Уи анагӡаразы ареспубликатә биуџьет аҟынтәи иазоужьхоит 16 млн. мааҭ, урҭ рахьынтә: 2024 шықәсазы – 4 млн. мааҭ; 2025 шықәсазы – 5 млн. мааҭ; 2026 шықәсазы – 7 млн. мааҭ.
