Уажәы аусурақәа активла имҩаԥысуеит: ахәыҷтәы каҳуажәырҭа аргылара ахыркәшамҭахь инеиуеит, аӡыршә аконструкциа ааганы аибыҭара иалагахьеит. Аусурақәа зегьы анхыркәшахалак ашьҭахь ари аҵакыра ахәҭа апарк аҵакыра хада иадлоит, ауааԥсыра рыԥшьараамҭа ахьырхырго акомплекс иахәҭакхоит.
«Ақалақь агәаҿы иҟоу асквер иҿыцу аӡыршәи ахәыҷтәы каҳауажәырҭеи рыла ирԥшӡахоит. Арҭ аобиектқәа ақалақь агәы иаҵанакуа апарк иацҵахоит, иара убри ала иаку аԥсшьаратә ҵакыра иахәҭакхоит», – ҳәа иазгәеиҭеит анардкыларатә еиҿкаара «СтройДом 2022» адиректор Раули Шамугиа.
Ақалақьтә парк ареконструкциа Ҭҟәарчал ақалақь аинфраструктура арҿиара аҿы акыр зҵазкуа шьаҿаны иҟалоит, ақалақь ауааԥсыреи асасцәеи рыԥсшьаразы иманшәалоу аҭагылазаашьақәа рзаԥызҵо обиектны иҟалоит.
Апарк аҿы имҩаԥысуа аусурақәа рфинансыркра апроект инақәыршәаны аҭыԥантәи абиуџьет ахарџь ала имҩаԥысуеит. Аусурақәа зегьы рхыркәшара ҳазҭоу ашықәс азы иазԥхьагәаҭоуп.
