Асасцәа зегьы ирыдыргалеит амилаҭтә чыс хкқәеи аҵәы иахаҵаны иӡу акәаци.

Удмуртиатәи аделегациа ахаҭарнакцәа аныҳәа аҟны ирбаз-ираҳаз аҟынтәи ирызцәырҵыз ацәаныррақәа ртәы еиҭарҳәеит: «Ҳара гәыкала бзиа иаабеит Аԥсны. Араҟа иумбар залшаӡом ауаа рганахьала иҟоу агәцаракреи абзиабареи.

Ҳара ҳаҩныҟа, ҳҭаацәа рахь ҳаазшәа ҳгәы иабоит – даараӡа зегьы бзианы еиҿкаауп, аҳалалра, агәыразра, агәбылра уныруеит. Иҳарҳаит аҩызцәа рацәаны, аҭыԥантәи аҵасқәеи ақьабзқәеи еилаҳкааит. Ҳгәаҵанӡа инеит иаабаз зегьы», - ҳәа ирҳәеит дара.

Приднестровтәи Молдавтәи Ареспублика Бендеры ақалақь (Очамчыра аиашьаратә қалақьны иҟоу) ахада Роман Иванченко очамчыраа рысасдкылара инаҵшьны иазгәеиҭеит.

«Акыр ҵуеит аԥсуа жәлар иамоу асасдкылара азы алегендақәа аԥырҵоижьҭеи, аха ҳара иахьа ҳаблала иаабаз, уи акырӡа уаршанхоит, угәаҵанӡа инеиуеит. Уаанӡа иҳаҳахьаз аасҭа акыр еиҳауп. Сара аԥсуа жәлар даараӡа бзиа избеит. Дара згәы аарту, иҳалалу, аха убри аан агәаӷь зызҭоу уаауп. Сара уи даараӡа уамашәа избеит. Иумбар залшаӡом аԥсуа жәлар рытрадициақәа шаҟа еиҷаҳауа, пату шақәырҵо. Сара сгәаанагарала уи зегьы ирыцкуп жәаҳәарада.  Аԥсуа жәлар зегьы гәык-ԥсыкала ирзеиӷьасшьар сҭахуп аҭынчра, аизҳазыӷьара, ашықәснҵыра ду, аизҳарақәа, ашәҭыкакаҷра», - ҳәа иҳәеит иара.