Аҟәа. Ԥхынгәымза 13, 2024 шықәса. Аԥсныпресс. Очамчыра ақалақь иахьа 2524 шықәса ахыҵуеит.
Хыԥхьаӡара рацәала аусмҩаԥгатәқәа азԥхьагәаҭоуп иахьа Очамчыра ақалақь аҿы. Аиҿкааҩцәа иалырхит аплошьадкақәа хԥа.
Актәи - ари аԥшаҳәа Хада ауп. Араҟа имҩаԥгахоит ақыҭанхамҩатә цәыргақәҵеи Очамчыра араион аҿы инхо анапҟазацәа русумҭақәа рцәыргақәҵеи, анаҩс имҩаԥысуеит анардқәа рзы иаарту атурнир. Уи рхы аладырхәыр ҟалоит изҭаху зегьы.
Аҩбатәи алокациа – ари апарк Хада ауп. Араҟа асааҭ 16:00 инаркны 18:00 рҟынӡа ахәыҷқәа рзы арлахҿыхратә усмҩаԥгатәқәа азԥхьагәаҭоуп. Апрограмма аҿы иҟоуп: бзиа ирбо алакәқәа, амультфильмқәа рфырхацәа рԥылара, аквестқәа, арлахҿыхратә қьаадтә шоу, афокусқәа, ашәахтә шоу, уҳәа убас ирацәаны.
Ахԥатәи аплошьадка – ари ақалақь аплошьад Хада ауп, араҟа асааҭ 19:30 рзы аԥсуа естрада артистцәа злаху аконцерт мҩаԥгахоит, иара убас аныҳәа иаҭааз рзы инагӡахоит аԥсуа жәлар рыкәашарақәеи рашәақәеи.
Агәырӷьаратә мшы хыркәшахоит асааҭ 22:00 рзы иҟало аныҳәатә феерверк ала.
