Аҟәа. Ԥхынгәымза 12, 2024 шықәса. Аԥсныпресс. Амилаҭтә сахьатә галереиа ахыбра актәи аихагыла аиҭашьақәыгылара ҩымз рыҩныҵҟа ихыркәшахоит.
«Ҳара ахыбра ахыб ықәҵаны ҳалгахьеит. Ажәытә хыб шьаҭаныла иқәган, уи амыцхәрас аҿыц ҟаҵоуп. Ахыбра актәи аихагыла аҩныҵҟа иргылоу аҩкаагатә ҭыӡқәа, урҭ рыбжьара ауадақәа ҟаҵахоит, абетон ықәырҭәаахоит. Аҵыхәтәаны ҳара аԥенџьырқәа аҿаҳҵоит.
Уажәы ахыбра ахаҿратә ган аԥслымӡкылҟьатә усдулара мҩаԥысуеит. Ҳара иазԥхьагәаҭаны иҳамоуп катәи аихагыла 1,5-2 мыз рыла ахархәарахь рыҭара», - ҳәа Аԥсныпресс акоррспондент диҿцәажәо еиҭеиҳәеит анардкыларатә еиҿкаара «Строймонтаж-2» адиректор Рустам Цәеиба.
Ахәҭакахьала, Амилаҭтә сахьатә галереиа адиректор Сурам Сақаниа, аиҭашьақәыргыларатә усурақәа зегьы анхыркәшахалак ашьҭахь аблра аҿы еиқәхаз асахьақәа зегьы иҷыдоу ахыб змоу амашьына ала аагара алыршахоит ҳәа иазгәеиҭеит.
«Шәара ижәдыруазар акәхап асахьақәа ӷәӷәала ааха шроуз атәы, урҭ акыр аиԥмыршәара аарԥшны ахыбра ҿыц ахь иаагатәуп. Асахьақәа зегьы анормақәа зегьы ирықәшәо иргылахоит», -ҳәа иҳәеит иара.
