Ԥхынгәымзазы ихацыркыз ареидтә усмҩаԥгатә аҵх агәанынӡа имҩаԥысуан. Уи иалагӡаны еиқәыршәахеит административтә зинеилагарақәа рзы 238 пкаанҵа. Иҳараку ахараԥсақәеи амашьырныҟәцаразы азин аршаҳаҭгақәа рымхразы аԥҟарақәеи  шышьақәыргылоугьы амашьынарныҟәцаҩцәа уеизгьы ижәны амашьына аԥсҟы шыркыц иркуеит.

Иацтәи амш иалагӡаны 12 - ҩык ижәны амашьына аԥсҟы ахьыркыз иахҟьаны амашьынарныҟәцаразы азин аршаҳаҭгақәа рымырхит. Хә-машьынак рымхуп, урҭ аҭагылазаашьақәа зегьы реилкаара мҩаԥысуанаҵы ахараԥсатә ргыларҭа ахь инагоуп.  

Аҩныҵҟатәи аусқәа рминистр Роберт Киут амашьынарныҟәцаҩцәа рахь амҩатә ԥҟарақәа рықәныҟәареи аҭакԥхықәра аарԥшреи рзы аахьара ҟаиҵеит. Аҩныҵҟатәи аусқәа Рминистрра иазԥхьагәанаҭоит ареспубликатә трасса аҿы 50 рҟынӡа  афото-видео камерақәа рышьақәыргылара. Авидеокамера  ҿыцқәа еиужьу ацәаҳәа адыргақәа рхысра, иԥгалоу ацәаҳәа ахь аиасра  рнылоит, иара убас аԥсҟы кны аҭел ала ицәажәо, мамзаргьы ашәарҭадара амаҟақәа змам ауаа аанарԥшлоит.  Уажәы иарбоу административтә зинеилагарақәа «напышьашәала» раарԥшра мҩаԥысуеит. Аха аҵакыра зегьы амҽхакра азы аусзуҩцәа-аинспекторцәа азхаӡом.

Аԥхынтәи аамҭахәҭа азы еиҳа ақәыӷәӷәара аиуоит ҳреспублика атуристә гәашәқәа ҳәа ирыԥхьаӡо – Гагра ақалақьи уи акәша-мыкәшеи.  Араҟа аштат инагӡаны иахьеидкылам азы Автоҳәынҭинспекциа аусзуҩцәа инормакым арежим ала аус рулар акәхоит.

Аԥсны аҩныҵҟатәи аусқәа рминистр Роберт Киут идҵа ала, ареидтә усмҩаԥгатәқәа аринахысгьы рымҩаԥгара иацҵахоит. Аҩныҵҟатәи аусқәа Рминистрра агәҽанызаара ҟанаҵоит ареидқәа рхықәкы хаданы ишыҟоу атәылауаа ргәабзиареи рыԥсҭазаареи ахьчара.