Нанҳәамза 16 рзы Аҟәа ақалақь, С. Ҷанба ихьӡ зху Аԥснытәи аҳәынҭқарратә драматә театр асцена аҿы иқәгылоит Хьыбла Герзмааи апианинорҳәаҩы Олег Аккуратови. Урҭ ахәаԥшцәа ирыдыргалоит 1940–70-тәи ашықәсқәа рзы иаԥҵаз ашәақәа рыла ишьақәгылоу автортә концерттә прогамма «Џьара ихараны, сгәалашәара аҿы…» («Где-то далеко, в памяти моей…»). Ари апрограмма уи аԥхьа лаҵаразазы Москва ақалақь аҿы адгалара мҩаԥган, қәҿиара дулагьы имҩаԥысит. Иара убас Хьыбла Герзмааи Олег Аккуратови алеиб «Мелодия» аҿы еицҭарыҩит еихьӡылоу аванилтә пластинка.
Нанҳәамза 18 рзы X ашәышықәса иаҵанакуа архитектуратә баҟа Бедиатәи аныхабаа амҵан ахортә музыка аконцерт мҩаԥгахоит. Хьыбла Герзмаа Урыстәылатәи Афедерациа жәлар рартист Лев Канторович инапхгарала Академиатә хор ду «Ахортә шәаҳәара азҟазацәа» («Мастера хорового пения»» лыцны дықәгылоит. Аҳ Баграҭ III ахәҟьаҟьа аҿы иргылаз Ажәытә ныхабаа – Аԥсны зегь реиҳа убла хызкуа аҭыԥқәа иреиуоуп. Араантәи унапсыргәыҵ ианушәа амшын уахыԥшылоит. Уашьҭахьҟа Кавказтәи ашьхаеибаркыра Хада улаԥш аахоит. Нанҳәамзатәи ахҭысқәа рсериа хыркәшахоит аџьазтә концерт ала – нанҳәамза 20 рзы Хьыбла Герзмаа асаксофонист Игорь Бутмани Сергеи Макеев напхгара зиҭо аџьаз-бенди Аҟәа ақалақь Атеатралтә плошьад аҿы иаарту асценаҿы дрыцықәгылоит. Амузыкантцәа ипопулиару аџьазтә стандартқәеи аклассикатә рҿиамҭақәеи нарыгӡоит. Анаҩс афестиваль ахҭысқәа Урыстәылаҟа ииасуеит. Аконцертқәеи аҟаза-классқәеи мҩаԥгахоит Москва, Санкт-Петербург, Самара, иара убас Мрагылара Наскьа ақалақьқәа рҿы: Владивосток, Благовешьенск, Хабаровск.
Хьыбла Герзмаа, Ильдар Абдразаков, Зинаида Царенко, Сергеи Скороходов, Виачеслав Василиев, Екатерина Савинкова, уҳәа егьырҭ адунеизегьтәи аопера аеҵәахәқәа ԥхынгәымзазы Аҟәа ақалақь аҿы асценаҿы иқәгылоит.
Аконцерт мҩаԥгахоит С. Ҷанба ихьӡ зху Аԥсуа драматә театр аҿаԥхьа иаарту аплошьадка аҿы. Аконцерт мҩаԥигоит актиор, амҩаԥгаҩ Иулиан Макаров. Афестиваль мҩаԥысуеит акультуратә аԥшьгарақәа рзы Аҳәынҭқарра Ахада ифонд адгыларала. Ахәаԥшцәа рзы аконцерт аҭаара хәыда-ԥсадоуп. Ааԥхьаратә билеҭқәа рыларҵәара мҩаԥнагоит Аԥсны акультура Аминистрра.
