Аҟәа. Ԥхынгәымза 5, 2024 шықәса. Аԥсныпресс. Акыраамҭа зҭагылазаашьа ҽеимыз Ҭҟәарчал ақалақь аплошьад Хада аҿы аиҭашьақәыргыларатә усурақәа ирылагеит. Иԥҽхьаз ашьаҟамҩатә хаҳәцәы, ақәоурақәа раан аӡы зҭатәоз ажрақәа – ари зегьы хара имгакәа ауаа ргәалашәараҿы мацара иаанхоит.
«Ари аплощадь – ҳақалақь ахаҿы ауп. Араҟа ииасуеит хыԥхьаӡара рацәала аӡхыҽҽақәа рахь ицо атуристцәа, араҟа иҟоуп ихадоу административтә хыбрақәа, абанк», – ҳәа аиҭашьақәыргыларатә усурақәа рзы ирыдыркылаз аӡбамҭа далацәажәеит араион ахада ихаҭыԥуаҩ Витали Кәыҵниа.
Уажәы Зҭакԥхықәра Ҳәаақәҵоу Аилазаара «СтройДом 2022» ашьаҟамҩақәа хаҳәцәыла рычаԥареи ацәхыԥқәа рышьақәыргылареи ирыдҳәалоу аусурақәа нанагӡоит. Уажәазы иазԥхьагәаҭоу 4 605 м² рҟынтәи ишьҭаҵоуп 2 400 м², уи аусурақәа зегьы рымҽхак аҟынтәи 50% аҟынӡа инаӡоит.
Анардкыларатә еиҿкаара адиректор Раули Шамугиа аусурақәа рхыркәшаразы иазыԥҵәоу аҽҳәарақәа оптимизмла дрыхәаԥшуеит. «Аконтракт ала ҳара аусурақәа ҳазҭоу ашықәс нҵәаанӡа ихҳарәшароуп, аха амш шцо ицар, усҟан аусурақәа зегьы ҽҳәараанӡа рылгара ҳҽазаҳшәоит», - ҳәа иҳәеит иара.
Араион Ахадара ахаҭарнак иажәақәа рыла, аусурақәа ашьаҟамҩақәа рҿы ахаҳәцәы аԥсахра мацарала ихыркәшахаӡом.
«Ҳара ахаҳәцәы аԥсахра мацара акәӡам хыдҵас иҳамоу. Ҳара ҳапроект иара убас аҵакыра комплексла ариаҵәареи арлашара асистема ҳаамҭа иақәшәо арҿыцреи иазкуп. Ари зынӡа иҿыцу ауааԥсыра ахьеизо ҭыԥны иҟалоит», – ҳәа еиҭеиҳәеит Витали Кәыҵниа.
Аусурақәа рхарџьынҵа – 12 млн. 707 нызықь мааҭ рҟынӡа инаӡоит, афинансыркра мҩаԥысуеит ареспубликатәи аҭыԥантәии абиуџьетқәа рҟынтәи.
Ақалақь ауааԥсыра иазгәарҭахьеит хра злоу аиҭакрақәа шыҟоу. «Уаанӡа амҩа араҟа даара аҭагылазаашьа ҽеимыз, уажәы акәзар уи уаныланы ацара гәахәароуп. Абанк ахь анеира маншәалоуп, иара ус баша анеиааирагьы», – ҳәа илҳәеит араҟа инхо аԥҳәыс.
Аплошьад аиҭашьақәыргылара – ари ақалақь агәы иахьаҵанакуа шьаҭанкыла аҭеиҭыԥш арҿыцра иазку мҽхакы ҭбаала ихацырыз апроект иахәҭакуп. Иҳаҩсыз ашықәс азы еиҭашьақәыргылан ақалақьтә парк, ишьақәыргылан ахәыҷтәы аспорттәи ахәмарратәи зонақәа. Сынтәа уи азааигәара аӡыршәи ахәыҷтәы кафетерии рыргылара иалагеит.
