Очамчыра араион Ахадара иатәу Амуниципалтә Унитартә Наплакы «Аӡыршьҭра» аиҳабы Авдени Џьопуа уажәы иргылахо аӡеизгарҭатә бааш ԥыхьатәи ахьгылаз аҭыԥ аҿы иргылахоит ҳәа иҳәеит. «Ари  аӡшьарҭра иакуеит 72 кубометр аӡы.  Уи аҳаракыра 6 метрак рҟынӡа инаӡалоит. Ақыҭауаа зҵаулара 48 метра иҟоу артезиантә ҵеиџь аҟынтәи ироулоит. Ҳара ишьақәырӷәӷәаз  аграфик ҳақәшәо ҳаауеит, изеиԥшразаалак уадаҩра ҳәа акгьы ыҟаӡам», - ҳәа иазгәеиҭеит Авдени Џьопуа.

Ԥыхьатәи аӡеизгарҭатә бааш асовет аамҭақәа рзы иргылан, уи изныкымкәа аиҭашьақәыргылара иахысхьан. «Шьаҭанкыла уи аԥсахразы азҵаара ықәгылеит иҳаҩсыз ашықәс анҵәамҭазы, усҟан уаҟа игылаз аӡшьарҭра зынӡа ахархәара амуа иԥхасҭахеит»», - ҳәа иҳәеит  иара.

«Зынӡа ақыҭаҿы инхоит 73 ҭаацәара.  Ашколи  28 ҭаацәареи ӡыда иаанхеит. Аӡынра аҵеиџьқәа рыхәон, аха уи иҟоу апроблема аӡбара алнаршомызт, избан акәзар урҭ рыҩныҵҟа аԥхынра лассы-ласы аӡы ҭабоит. Ҳара ацхыраара ҳақәдыргәыӷит аҭыԥантәи анапхгара. Абар, ишыжәбо, аӡхагаларатә бааш ҿыц аргылара мҩаԥысуеит», – ҳәа иазгәеиҭеит Мықә ақыҭа ахада Беслан Араҳамиа. 

Аӡеизгарҭатә бааш ҿыц аргылара афинансыркра ареспубликатә биуџьет аҟынтәи имҩаԥысуеит. Аусурақәа рхарџьынҵа  - х-миллион мааҭ инарзынаԥшуеит.

Аӡеизгарҭатә бааш ҿыц ахархәарахьы ирыҭахоит ҳазҭоу ашықәс нанҳәамза анҵәамҭазы.