Сынтәа адкыларазы аусшәҟәқәа рыдкылара 40 хырхарҭа рла имҩаԥсуеит. Иҟоуп аиҭакрақәагьы. Абиологиа-географиатә факультет ҩ-факультетны еихыршеит: агеографиеи атуризми, абиологиеи абиологиатә медицинеи ҳәа.  Абиологиеи абиологиатә медицинеи рфакультет аҿы иҟалеит азанааҭ ҿыц «фармациа». 

«Ари ахырхарҭа ала ашколхәыҷқәа ролимпиада аҿы аиааира згазгьы дыҟоуп. Уи ААУ адкыларазы иабжьгара мҩаԥгоуп.  Иахьа, актәи адкыларатә мшы азы иҿыцу ари азанааҭ ахь абитуриенцәа ԥыҭҩык аусшәҟәқәа аларҵеит. Иҿыцу азанааҭҵара ҟалеит аҟазара афакультет аҿгьы – «аопертә шәаҳәара». Сара сгәы иаанагоит ари азанааҭҵара ала аҵара зҭаххогьы ҟалоит», – ҳәа иҳәеит Адгәыр Какоба.

Иара убас, адкыларатә комиссиа аҭакзыԥхықә маӡаныҟәгаҩ иажәақәа рыла, абитуриентцәа аԥсуа бызшәа шырдыруа агәаҭара иазку акомиссиагьы аԥҵоуп. Уи астудентцәа аԥсуа бызшәа шырдыруа ала агәыԥқәа рыла реихшара аҿы ицхыраагӡахоит.

Апсихологиа азы акомиссиа азиндырратә факультет «апсихологиа» азанааҭҵара иҭало абитуриентцәа ирыҿцәажәалоит.       

«Ԥхынгәымза 17 инаркны ԥхынгәымза 30 аҟынӡа ҳара адкыларатә ԥышәарақәа рымҩаԥгара азԥхьагәаҭаны иҳамоуп», – ҳәа еиҭеиҳәеит Адгәыр Какоба.