Ԥстәбарада, аӷа иҽмырбаӡакәа аӡхыҵра аналдырша ашьҭахь, арра-мшынтә десант аибашьцәа урҭ ирзыԥшыз Мрагыларатәи афронт аибашьцәа ирыцлеит. Адесант напхгара аиҭон Заур Занҭариа.
Адесант алахәылацәеи Мрагыларатәи афронт аруааи рҽеибыҭаны астратегиатә ҵак ду змаз амҩаду Очамчыра-Аҟәа ааныркылеит, уи алагьы еиԥырҟьеит аӷа ири итехникеи амцашыра иалагылаз Аҟәа ақалақь ахь рынашьҭра. Аҭыԥ аҿы еицымҩаԥыргон хыԥхьаӡарала акыр еиҳаз, бџьарла еиқәных иҟаз аӷа хҩахахак изымҭоз ажәыларақәа. Ҳаибашьцәа ирҿагылан аӷа имотохысратә баталионқәа ааба, итанктә бригада, иартиллериатә дивизион. Бжьаха-бжьымш рыҩныҵҟа Аԥсуа ар амҩаду рнапаҿы иаанкыланы ирыман. Иҭархан шәҩыла ақырҭуа гвардееццәа, хыԥхьаӡара рацәала арратә техника, трофеи ҳасабла иган еиуеиԥшым абџьар, аџьаԥҳаны.
Аԥсны Аҳәынҭқарра Арратә мчқәа Ркомандаҟаҵаҩ хада Владислав Арӡынба Аԥсадгьыл ахьчаҩцәа Очамчыра араион Тамшь ақыҭан арратә операциа амҩаԥгараан иаадырԥшыз афырхаҵара, агәымшәара, аҟазара ҳарак азгәаҭо амшынтә десант алахәылацәа, Мрагыларатәи афоронт арҟәшақәа, Ареспублика Арра-мшынтә мчқәа аџьшьара риҭеит, еиҳа зҽалызкааз аҳәынҭқарратә ҳамҭақәа ранашьаразы рыхьӡ ҳәан.
Тамшьтәи аоперациа аибашьараҿ аиааира агаразы реиҳа аҵакы змаз иреиуан, уи – зегь ззыԥшыз амш арааигәара алзыршаз операциан. Ԥхынгәымзатәи арҭ амшқәа рыҩныҵҟа Аԥсадгьыл рхы ақәырҵеит 57-ҩык зхи-зыԥси ирмегӡаз аибашьцәа гәымшәақәа, еиуеиԥшымыз ахәрақәа роуит 153-ҩык Аԥсны аԥацәа.
Очамчыра араион Тамшь ақыҭан имҩаԥгаз адесанттә операциа 1992-1993 шш. Аԥсны жәлар Рџьынџьтәылатәи еибашьра ахьӡ-аԥша зныԥшуа даҟьаны аҭоурых иазынхеит. ***
