Аҟәа. Рашәарамза 26, 2024 шықәса. Аԥсныпресс. Аԥсны зҽаԥсазтәыз азыҟаҵаҩ А. М. Седов игәалашәара иазку ахацәа ркомандақәа рыбжьара амҵәышәмпыл азы I Жәларбжьаратәи атурнир Аҟәа ақалақь аҿы иалагеит.
Аԥснытәи ԥшь-командаки Ҟарачы-Черқьесиатә Ареспублика аҳҭнықалақь Черқьесскынтәи акомандеи атурнир ачемпион ҳәа ахьӡ азы еицлаблоит.
Урыстәыла аус ацуразы Аԥсны иҟоу Ахаҭарнакра анапхгаҩы Дмитри Федотов аспортсменцәа атурнир аартра рыдиныҳәалеит:
«Аспортсмен еихьӡарақәа акыр азыҟаҵаҩ идҳәалоуп. Алеқсандр Михаил-иԥа иааӡеит иакымкәа амҵәышәмпыл абиԥарақәа. Аспорт ауаҩы ихықәкқәа рынагӡараҿы, иԥсҭазаара ашьқәгылараҿы акыр ицхраауеит, деиӷьнатәуеит».
Атурнир рашәарамза 30 аҟынӡа имҩаԥыслоит. Уи аиҿкаара ахахьы иагеит Аԥсны иҟоу Урыстәыла аус ацуразы Ахаҭарнакреи Аԥсны Аҳәынҭқарра амҵәышәмпыл Афедерациеи.
