Аҟәа. Рашәарамза 28, 2024 шықәса. Аԥсныпресс. Аҟәа ақалақьтә ӡбарҭа аҿы аҩныҵҟатәи аусқәа Рминистрра аусеилыргаратә ҟәша Урыстәылатәи Афедерациа атәылауаҩ Усов Денис Сергеи-иԥа ихьырхәра аҳасабала аҭакра изалхра азы иҟанаҵаз азыҳәаҭа иахәаԥшит, ҳәа адырра ҟанаҵоит Аҟәа ақалақь аӡбарҭа апресс-маҵзура.
Заанаҵтәи аусеилыргарала ишышьақәыргылаз ала, хәажәкырамза, 2024 шықәса рзы Санкт-Петербург ақалақь аҿы Денис Усов «Леша», «Козлов Андреи» ҳәа апсевдоним змоу зхаҭара шьақәыргылам ахаҿқәа злахәыз агәыԥ еиҿикааит. Уи доусы рхыдҵақәа рынагӡара азгәаҭаны, аибабарада, зыкапан дуу анаркотикатә маҭәашьарқәа изакәанымкәа раагареи рыҭиреи хықәкыс иаман.
2024 шықәса, хәажәкырамза анҵәамҭазы Денис Усов Урыстәылатәи Афедерациа иахьаҵанакуаз «Леша» ҳәа апсевдоним змаз зхаҭара шьақәыргылам ахаҿы дицырхырааны аелектронтә плошьадка «Кракен» ала изакәанымкәа иааихәеит ҷыдала зыкапан дуу анаркотикатә маҭәашьар «мефедрон». Иабоу анаркотиатә маҭәашьар азеԥш капан 8 кьылаки 785,428 грамми иреиҵаӡамызт.
2024 шықәса, лаҵарамзазы еиҿкааз агәыԥ алахәыла – «Козлов Андреи» ҳәа апсевдоним змаз зхаҭара шьақәыргылам ахаҿы Денис Усов идҵа ала иарбоу анаркотикатә маҭәашьар изакәанымкәа Аушьҭра-гәаҭаратә Ҭыԥ «Ԥсоу» ала Аҳәынҭқарратә ҳәаа иахыганы Ареспублика Аԥсныҟа иааигеит. Уи анаҩс анаркотикатә маҭәашьарқәа Аҟәа араион Алада Ешыра ақыҭа иахьаҵанакуа «имаӡоу аҵәахырҭаҿы» ишьҭеиҵеит. Уи ашьҭахь дара Краснодар ақалақь, Ахәаахәҭратә Центр «Оз Молл» аҿы еиԥыланы Аԥсны иҟаҵаз «имаӡоу аҵәахырҭа» акооринатқәа еимырдеит.
2024 шықәса, рашәарамза 13 рзы Денис Усов ацәгьоуратә гәҭакқәа иманы Аԥсныҟа дааит. 2024 шықәса, рашәарамза 15 рзы Урыстәыла қьырала игаз амашьына HAVAL ала Аҟәа араион, Алада Ешыра ақыҭан абнара азааигәара иҟаз «имаӡоу аҵәахырҭаҭыԥ» ԥшааны, уа иҭаҵәахыз «мефедрон» ҳәа изышьҭоу анаркотикатә маҭәашьар игеит. Ззеиԥш капан 3 кьылаки 341 грамми рҟынӡа инаӡоз анаркотикатә маҭәашьар ахәҭак Денис Усов анаҩс аҭиразы изакәанымкәа автомашьына аҿы иҵәахны иман, егьи ахәҭак (302,166 грамм) – ицыз арҭмаҟ иҭан, иаанхаз 5 кьылаки 142,262 грамми изакәанымкәа «имаӡоу аҵәахырҭаҭыԥқәа» ԥшьба рыҟаҵарала Алада Ешыра ақыҭан иҭиит.
2024 шықәса, рашәарамза 26 рзы Аҟәа ақалақь аӡбарҭа аҿы Аԥсны Аҳәынҭқарра Ашьаустә Закәанеидкыла ахәҭаҷ 224, ахәҭа 3, апунтқәа «а», «в», ахәҭаҷ 224.1, ахәҭа 3, апунктқәа «а», «б» иазԥхьагәанаҭо ацәгьоурақәа рзы игәҩароу Денис Усов иганахьала ахьырхәра аҳасабала 2 мыз, нанҳәамза 16, 2024 шықәсанӡа аҭакра алхра азы аӡбамҭа рыдыркылеит.
