Аҟәа. Лаҵарамза 22, 2024 шықәса. Аԥсныпресс. Ареспубликатә ҳәынҭқаратә Усбарҭа «Аԥснымедиа» аусзуҩцәа амедиа-холдинг анапхгаҩы Роберт Џьопуа ицны Ҭаҭарсҭан аҳҭнықалақь Ҟазан иҟоуп. Ари аҭаара ахықәкқәа иреуоуп – аинформациа ала аимадара аганахьала аусеицура арӷәӷәара.
Иҳаҩсыз ашықәс азы «Аԥснымедиа» аделегациа раԥхьаӡа акәны Ҭаҭарсҭан иаҭааны ареспублика аҳәынҭқарратә массатә информациатә хархәагақәа зегьы еидызкыло акционертә Еилазаара «Татмедиа» аҟынтәи рколлегацәа рыҽрымардеит.
«Апснымедиа» адиректор Хада Роберт Џьопуа иажәақәа рыла, ари аҭааара хықәкыс иамаз ҭаҭартәи амедиа амадареи «Татмедиа» иарҳаз аԥышәа рыҿцаареи ауп.
Иҳаҩсыз ашықәс абҵарамзазы «Татмедиа» аҟынтәи ҳколлегацәа «Апснымедиа» ажурналистцәа рзы онлаин арежим ала асеминарқәа мҩаԥыргеит, анаҩс Аԥсныҟа иааит рԥышәа ала аиамадара абжьаҵара азы.
Уажәы «Аԥснымедиа» ажурналистцәа «Татмедиа» аԥышәа амадара адагьы Аԥсны амилаҭтә командагьы злаху Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҟытәи арепортажқәа рыҟаҵаразгьы алшара рыман.
Агазеҭ «Аԥсны» акоординатор Кристина Инаԥшьба агазеҭ аредакциа аусура атәы аилкааразы алшара лзаԥҵан, араҟа лыблала илбеит агазеҭ даҟьала аиқәыршәара еиҳа еиӷьны аҟаҵара шауа, иҿыцу аҟаҵашьақәа (априомқәа), иара убас асоциалтә ҳақәа рҿы акьыԥхьтә ҭыжьымҭақәеи асаит амҩаԥгара иамоу аҷыдарақәеи ртәы лзеиҭарҳәеит.
«Аԥсныпресс» ажурналист Аманда Касланӡиа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы иҟаз аусмҩаԥгатәқәа рзы адырраҭарақәа ҟалҵон, раԥхьа иргыланы аԥснытәи аспортсменцәа злахәыз. Лара иара убас даҭааит аинформациатә агентра «Татар-информ» аредакциа. Аредакциа аҿы лколлегацәа илзеиҭарҳәеит аспорттә усмҩаԥгатәқәа рҟынтәи арепортажқәа реиқәыршәара азы ирымоу адыррақәа ртәы.
«Аԥышәеимадара, ари ианакәызаалак иҿыцу џьара акы аилкаареи иҿыцу џьара акы атәы аиҭаҳәареи рзы зеиӷьаҟам лшароуп», - ҳәа илыԥхьаӡоит Аманда Касланӡиа.
Аинформациатә Маҵзура «Татар-информи» асаит «Интертати» ҭаҭартәи аредакциа аредактор хада Рамис Латыпов, аԥышәеимадара дарбанызаалак ажурналист иԥсҭазаара аҿы даара акыр зҵазкуа процессуп ҳәа иазгәеиҭеит.
«Иҳаҩсыз ашықәс азы сколлегеи сареи Аԥсны ҳаҟан, сара сзы уи даара хра злоуу ҭаараны иҟалеит. Аибабареи аимадареи ахаангьы хра злоу усны иҟан. Ҳара иаадыруеит ҳгәылацәа аус шыруа атәы, аха ихароу арегионқәа рҟынтәи ҳколлегацәа рхы иадырхәо аинтерес зҵоу априомқәа зны-зынла иааџьаушьаратәы иҟоуп. Лассы-лассы иҟалалоит абас, уара иҟаҵатәу удыруеит, аха уколлега уи аганахьала иабжьгара уоурц уҭаххоит. Шьҭарнахыс ҳара иҳамоуп аҩызцәа бзиақәа Аԥсны, ҳара гәахәара дула аԥышәеимдара ҳазхиоуп», - ҳәа иҳәеит Рамис Латыпов.
Цәыббрамза 21, 2023 шықәса рзы Ареспубликатә ҳәынҭқарратә Усбарҭа «Аԥснымедиеи» Акционертә Еилазаара «Татмедиеи» Ҭаҭарсҭан аделегациа Аԥсныҟа аара аҳәаақәа ирҭагӡаны аусеицуразы Аиқәшаҳаҭра рыбжьарҵеит.
