Ашәарҭадара Ахеилак Амаӡаныҟәгаҩ Сергеи Шамба убасҵәҟьа игәалаиршәеит: «Аибашьра анынҵәа ашьҭахь Еиду Амилаҭқәа Реиҿкаара ахылаԥшрала аконфликт аҭышәынтәалара азы аиҿцәажәарақәа мҩаԥысуан. Женевеи Москвеи имҩаԥысуаз аиҿцәажәарақәагьы ыҟан. Москва ақалақь аҿы лаҵарамзазы имҩаԥысуаз аҵыхәтәантәи аиҿцәажәарақәа раан аганқәа аибашьра аанкыларазы еиқәшаҳаҭхеит. Иарбоу Аиқәшаҳаҭра иазԥхьагәанаҭон еиҿагылоу аганқәа реидыхра азы Ихьыԥшым Аҳәынҭқаррақәа Реиҩызара абжьаҟазаратә мчқәа ралагалара. Ари апроцесс алагеит рашәарамза 21 рзы. Абжьаҟазаратә мчқәа аԥснытәии қырҭтәылатәии еиҿагылоу аганқәа рыбжьара, зҭагӡара 24 км. рҟынӡа инаӡоз абжьазаара – аҳәаа аҟынтәи аҩганк рганахьала 12-12 анаскьарала иҩагылеит. Ари ашәарҭадара азона акәхеит. Араҟа азин ыҟамызт арбџьармчқәеи ихьанҭоу арратә техникеи рыҟазаара азы. 12 километрак рҟынӡа инаӡон абџьар аԥкра азона ҳәа изышьҭазгьы. Араҟагьы азин ыҟамызт аганқәа иртәу арбџьармчқәа ртехника аҟазааразы. Амилициа акәзар, уи ахатәы абџьарҭаҩ акәын аныҟәгаразы азин иамаз». Сергеи Шамба Аиқәшаҳаҭра анапаҵыҩра Аԥсны азы иаанагозгьы далацәажәеит: «Ҳара ҳзы Аиқәшаҳаҭра анапаҵыҩра акырӡа аҵанакуан, избан акәзар, уи Қырҭтәыла аҟынтәи иҿыцу агрессиа аԥхьырҟәҟәаара алнаршон. Убри инаркны Қырҭтәылеи Аԥсни реизыҟазаашьақәа аиҳарак адипломатиатә хырхарҭала ишьақәгыло иалагеит. Убри аан иазгәаҭатәуп, Қырҭтәыла Аԥсны аганахьала изныкымкәа апровокациақәа шымҩаԥнагоз. Иагьа ус иҟазаргьы, иазгәоумҭар залшом 14 шықәса инарзынаԥшуа ақырҭуа ган аҟнытә Урыстәыла Арбџьар Мчқәа ралгара азҵаара шықәыргылазгьы абжьаҟазаратә миссиа анапынҵа анагӡара шымҩаԥысуаз. Урыстәылатәи абжьаҟазаратә мчқәа инарыгӡаз аусура амҽхак акырӡа идууп - 1500 - ҩык инареиҳаны аамҭак ала аҭынчра аиқәырхареи усҟан ажәлар рзы акрызҵазкуаз Егрытәи ацҳа ахьчара уахь иналаҵаны, аӡфымцастанциа ахьчареи алдыршон. Ишдыру еиԥш иара астанциа ахаҭа ҳара ҳганахь иҟоуп, аха аӡыхкыреи аӡеизакырҭеи - Қырҭтәыла аганахьала.
Абжьаҟазацәа роуп ари аӡфымцастанциа аҿы ашәарҭадареи аусуреи алзыршоз. Рыцҳарас иҟалаз ари амиссиа рыԥсҭазаара ақәырҵеит 117-ҩык урыстәылатәи абжьаҟазаҩцәа. Аха Урыстәылатәи Афедерациа Арбџьар Мчқәа рыруаа Аԥсны шықәсырацәала аҭынчра аиқәырхареи аибашьра аиҭахацмыркреи рылшеит», – ҳәа иҳәеит Сергеи Шамба.
Аԥсны иҟоу Приднетровие Азинмчы змоу ахаҭарнак, Аԥсны атәылахьчара аминистр ԥыхьатәи ихаҭыԥуаҩ Гарри Кәпалба игәалаиршәоит абас: «Сара ибзиаӡаны исгәалашәоит уи амш – лаҵарамза 21, 1994 шықәса. Избан акәзар, ҳара зегьы даара ҳазыԥшын урыстәылатәи абжьаҟазаҩцәа ацхыраара азы ианаҳзаауа ҳәа. Ашәарҭадара азонақәа рҳәаакра мҩаԥган – аҳәаа аҟынтәи аҩганк рганахьала 12-12 анаскьарала зҭагӡара 24 км. рҟынӡа инаӡоз абжьазаара шьақәыргылан. Усҟантәи аамҭазы ҳара ҳганахь иаауа иалагеит адиверсиатә гәыԥқәа, убри иахҟьаны иҭахон ауаа. Уи зегьы еиҿызкаауаз Қырҭтәыла иҷыдоу амаҵзурақәа ракәын. Иҟан иара убас абандитцәа ргәыԥқәагьы, урҭ ари аҵакыра бзианы ишырдыруаз ала, анаҩс аҿыхԥа аиуразы ауаа рԥаара еиҿыркаауан. Абжьаҟазаратә миссиа амҩаԥгара аамҭа аҩныҵҟа аԥсуа-қырҭуатә ҳәаа зынӡа иахысит 70 нызықьҩык рҟынӡа ауаа. Усҟан араҟа игылаз зегьы жәаҳәарада рыԥсҭазаара ашәарҭара иҭаргыланы рырратә уалԥшьа нарыгӡон. Урҭ зегьы Аԥсны ашәарҭадара ашьақәыргылара аҿы рлагала алоуп. УА АМ аҟнытә абжьаҟазаратә мчқәа ихадароу ароль нарыгӡеит аибашьра аанкылареи аԥхьаҟагьы аимак арӷыӷкра алмыршареи рзы. Абжьаҟазацәа ирылшоз зегьы ҟарҵеит амандат анагӡара азы»».
