Аҟәа. Рашәарамза 18, 2024 шықәса. Аԥсныпресс. Иҭыҵит алитература-сахьаркыратә, ауаажәларра-политикатә журнал «Алашара» ахԥатәи аномер.
Араздел хә-хәҭак аиубилеитә рыцхәқәа ирызкуп: аԥсуа литература ашьаҭаркҩы Дырмит Гәлиа диижьҭеи 150-шықәса аҵра, Асовет Еидгыла жәлар рартист Шәарах Ԥачалиа диижьҭеи 110-шықәса аҵра, апублицист Иури Лакрба диижьҭеи 90-шықәса аҵра, ашәҟәыҩҩы, ауаажәларратә усзуҩ Геннади Аламиа 75-шықәса ихыҵра, ашәҟәыҩҩы Еҭери Басариа диижьҭеит 75-шықәса аҵра, апоет Иван75-шықәса ихыҵра.
Ажурнал иара убас ианылеит аԥсшәахь еиҭагоу Алеқсандр Вампилов ипиеса «Аԥа еиҳабы» («Старший сын») - (еиҭеигеит Геннади Аламиа), иара убас Антон Чехов иажәабжь «Ачынуаҩ иԥсра» («Смерть чиновника») - (еиҭеигеит Енвер Ажьиба).
Арубрика «Аҿар рыбжьы» аҿы икьыԥхьхеит Џьамбул Инџьгиа иажәеинраалақәа.
Арубрика «Апублицистика» аҿы икьыԥхьхеит Руслан Қаԥбеи Борис Қаџьааи рыстатиақәа.
Ажурнал аҿы иара убас иҟоуп «Аԥхьаҩцәа ражәеинраалақәа» ҳәа арубрика. Уажәазы уи иалалеит Лиубовь Черқьезиеи Мадина Дараселиеи ражәеинраалақәа.
2024-тәи ашықәс Аԥсны Дырмит Гәлиа ишықәсны ирылаҳәоуп. Жәабранмза 21 рзы аԥсуа ҩыратә литература ауасхыр шьҭазҵаз Дырмит Гәлиа диижьҭеит 150 шықәса ҵуеит. Ажурнал аҿы икьыԥхьуп Дырмит Гәлиа изку Анатоли Лагулааи Белла Барцыцԥҳаи ражәеинраалақәа, Ельвира Арсалиа лыстатиа «Дырмит Гәлиа аԥсуа сахьаркыратә рҿиара аҿы» («Дмитрий Гулиа в абхазском художественном творчестве»), иара убас Енвер Ажьиба иажәабжь «Егьа ус иҟазаргьы».
Ажурнал ианылаз Еҭери Басариа лажәабжь «Амҩа» («Путь») аԥсшәахь еиҭеигеит ашәҟәыҩҩы Алықьса Гогәуа.
Арубрика «Анаука» аҿы икьыԥхьхеит аҭоурыхтә наукақәа рдоктор Валери Бигәаа истатиа «Ажьахара – аҭаацәара рынцәахәы», иара убас Аԥснытәи аҳәынҭқарратә музеи адиректор Аркади Џьапуа истатиа «Ҵабалтәи абааш: аԥсуаа ретногенез ашьаҭақәа» («Цабалская крепость: корни этногенеза абхазов»).
Ажурнал ахԥатәи аномер аҿы иара убас аԥхьаҩ идгалахоит Кәымф Ломиа, Дмитри Габелиа ражәеинраалақәа, Валентин Коӷониа истатиа «Даур Занҭариа ипроза аҿы аҭоурых атема» («Тема истории в прозе Даура Зантария»), ажурналист Елеонора Коӷониаԥҳаи ашәҟәыҩҩы Даур Наҷҟьебиеи реиҿцәажәара.
Ажурнал 1955 шықәса раахыс иҭыҵуеит. Аҭыжьымҭа аредактор хада – апоет Анатоли Лагәлаа.
