Аҟәа. Рашәарамза 19, 2024 шықәса. Аԥсныпресс. Рашәарамза 19 рзы Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рҿы аԥснытәи аспортсменцәа х-дисциплинак – ашахматқәа, абырзен-римтәи аиқәԥара, абокс рыла аицлабрақәа ирылахәхеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.
Иахьа имҩаԥысуеит ашахматтә турнир аҩбатәи амш, аспортсменцәа «блиц» аформат ала жәеиза партиа рыла ахәмаррақәа рзыԥшуп.
«Акоманда алҵшәа бзиақәа раарԥшреи амедалқәа ргареи рҽазыршәоит», - ҳәа иазгәеиҭеит аԥснытәи ашахматистцәа разыҟаҵаҩ Альберт Карапетиан.
Аԥснытәи акоманда аилазаараҿы иҟоуп – Оҭар Хәырхәмал, Асиа Арҩыҭаа, Деиа Амҷба, Руслан Ӡиаԥшьба.
Иахьаҵәҟьа абырзен-римтәи аиқәԥара азы афиналбжатәии заанаҵтәи аиндаҭларақәа мҩаԥысраны иҟоуп. Аԥсны ахьӡала иқәгылоит Рамазан Арапханов, Ерик Кәакәасқьыр, Иван Хорошилов, Руслан Кәыҵниа, Ҭемыр Инаԥшьба. Аиқәԥаҩцәа рызыҟаҵаҩ – Размик Алабиан.
Абокс азы аицлабрақәа Аԥсны ахьӡала иалахәхоит Герман Арџьениа, Игорь Адлеиба, Баҭал Чежьиа, Саир Качараа, Беата Аршба, Нестор Џьанба.
63,5 кьыла рҟынӡа иҟоу акапантә категориа иаҵанакуа рыбжьара дықәгылоит Нестор Џьанба.
Аицлабрақәа ишиашоу ала ицо аефир ала иубар алшоит асоциалтә ҳа «Вконтакте» иҟоу Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа ацҵа аҿы.
Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа Ҟазан ақалақь аҿы рашәарамза 12 – 23 рҟынӡа имҩаԥысуеит. Урҭ рхы аладырхәеит 5 –нызықьҩык инареиҳаны аспортсменцәа. Аицлабрақәа 27 спорт-хкы рыла имҩаԥысуеит. Идырхәмарраны иҟоуп 387 комплект амедалқәа.
