Аҟәа. Рашәарамза 14, 2024 шықәса. Аԥсныпресс. Аԥсныҟа иааны иҟоуп Урыстәылатәи Афедерациа аекономикатә ҿиара Аминистрра аделегациа. Уи напхгара аиҭоит Урыстәыла аекономикатә ҿиара аминистр ихаҭыԥуаҩ Дмитри Вольвач.
Иахьа Аинвестициатә Программа ахарџь ала зфинансыркра мҩаԥысуа аобиектқәа рҭаара алагеит Ареспубликатә хәыҷтәы хәышәтәырҭа ала. Иарбоу апроект анагӡара хацыркын ҳазҭоу амыз азы.
Ари аусмҩаԥгатә афинансыркра алимит – 651,9 млн. мааҭ рҟынӡа инаӡоит. 65 шьҭаларҭа ахьыҟало, зымҽхак 4550,79 ԥшьыркцатә метр рҟынӡа инаӡо, х-еихагылакны иҟало ахыбра хы-шықәса рыла аргылара азԥхьагәаҭоуп.
Апроект иазоужьу аҵакыра 10 850 ԥшьыркцатә метр рҟынӡа инаӡоит.
Ахәышәтәырҭаҿы иҟалоит адиагностикатә ҟәша, аԥҟаратә ҟәша, ихадоу азҩыдатәратә ҟәша, алабораториа, амаҵзура-бзазаратә уадақәа, ахәыҟаҵарҭатә блок.
Ахыбра актәи аихагыла аҿы иҟалоит адкыларҭа, ашәҟәҭаҩратә ҟәша (арегестратура), ахәаԥшратә кабинетқәа, арентген-диагностикатә ҟәша, аклиника-диагностикатә ҟәша, ахәыҟаҵарҭатә блок.
Дмитри Вольвач ареспублика ахәыҷқәа амедицинатә цхыраара рыҭаразы иреиӷьу аҭагылазаашьақәа раԥҵара азҵаара аҵак ду змоу акакәны иԥхьаӡоуп ҳәа инаҵшьны иазгәеиҭеит. Иара иҟоу алимитқәа рҳәаақәа ирҭагӡаны иназыцҵоу аԥаратә хархәагақәа рыԥԥшаара иадҳәалоу ихадоу азҵаарақәа рыла аӡбамҭақәа рыдкылара алыршахеит ҳәа иазгәеиҭеит. Иарбоу аӡбамҭақәа ақәыршаҳаҭра роуит Урыстәылатәи Афедерациа Анапхгареи Ареспублика Аԥсны Анапхгареи рҿы. Акыр аҵанакуеит, Ареспубликатә хәышәтәырҭа акомплекс аҿы ахәыҷтәы хәышәтәырҭа аргыларала иаку амедицинатә комплекс ахьԥҵахо.
Иарбоу аобиект аҿы аделегациа ирԥылеит атәыла агәабзиарахьчара аминистр Едуард Быҭәба, Ареспубликатә хәышәтәырҭа аҳақьым хада Ерик Ҳаҭхәа, анардкылатә еилазаара хада – ЗҲәА «КДК ДЕВЕЛОПМЕНТ» ахаҭарнакцәа.
