Аҟәа. Рашәарамза 12, 2024 шықәса. Аԥсныпресс. Еицырдыруа Аԥсны жәлар рартистка Нинель Бжьаниеи Аԥсны зҽаԥсазтәыз артистка Гәылиза Аҩӡбеи Аԥсны жәлар рартист, адирижиор, асахьаркыратә напхгаҩы Давид Терзиан напхгара зиҭо Аԥснытәи аҳәынҭқарратә камертә оркестри рдует Шәача ақалақь аҿы, апроект «Урыстәылеи Аԥсни раҟ-ааҟтәи аимдаратә культуратә усмҩаԥгатәқәа» («Обменные культурные мероприятия России и Абхазии») аҳәаақәа ирҭагӡаны аконцерт «Piano Duo & Orchestra» мҩаԥысит.
Аконцерт Piano Duo & Orchestra апрограмма аҿы иҟан еиуеиԥшым аепохақәеи ажанрқәеи ирыҵанакуа арҿиамҭақәа, ҳәа адырра ҟанаҵоит Аԥсны акультуура Аминистрра апресс-маҵзура.
Аконцерт аҿы инарыгӡеит акомпозитор-классикцәа дуқәа раԥҵамҭақәеи урҭ ҳаамҭазтәи аусдуларақәеи. Ахәылԥаз иаҭааз асасцәа ирыдгалан Т. Џь. Альбинони, Ж. Бизе, С. Рахманинов, С. Прокофиев, Н. Римски-Корсаков, Г. Свиридов, Д. Шостакович, К. Џьенкин, уҳәа егьырҭ иналукааша аклассикцәа ԥсра зқәым раԥҵамҭақәа. Аконцерт иаҭааз иара убас гәахәарыла ирыдыркылеит бзиа ирбо акинофильмқәеи анимациатә фильмқәеи рзы асаундрекқәа.
Аконцерт Урыстәыла Амш азгәаҭара иадҳәаланы еиҿкаахеит.
