Кәтол ақыҭан аӡыхкыра ашьақәыргылареи ацҳа аиҭашьақәыргылареи рзы аусурақәа мҩаԥган. Урҭ  ирықәхарџьхеит 4, 3  млн. мааҭ. Анаҩс аргылаҩцәа Баслахә (14,5 млн. мааҭ), Ҭхьына (7,5 млн. мааҭ) ақыҭақәа рҿы аҟәарарӷәӷәаратә  усурақәа мҩаԥган.

Ихыркәшахеит аҟәарарӷәӷареи Лашькьындар ақыҭан  аӡиас аӡышьҭра арыцқьареи ирыдҳәалоу аусурақәа. Уи иақәхарџьхеит 6,5 млн. мааҭ.  

Мархьаул ақыҭан автомашьынатә цҳа аиҭашьақәыргылара азы ахарџьынҵа аиқәыршәара мҩаԥысуеит. Уи азы иазԥхьагәаҭоу аԥаратә хархәагақәа реицҵалыҵ 24 млн. мааҭ рҟынӡа инаӡоит.  

Аилатәара аҿы иара убас 2024 шықәсазы ареспубликатә биуџьет ахарџь ала аиҭашьақәыргылара, аргылара, мамзаргьы ареконструкциа зҭаху аобиектқәа рсиа ашьақәыргыларазы имҩаԥгатәу аусмҩаԥгатәқәа ирылацәажәеит. Асиа иалагалоуп асоциалтәи аинфраструктуратә зкызаара змоу 93 обиект. Иарбоу аобиектқәа рҿы аусурақәа рхарџьынҵа ааизакны 420 млн. мааҭ еиҳауп. Ашьақәырӷәӷәаразы аиқәыршәара мҩаԥысуеит хыхь иарбоу азкызаара змоу даҽа  38 обиект рсиа. Араҟа имҩаԥысраны иҟоу аусурақәа рхарџьынҵа  279 млн. мааҭ рҟынӡа инаӡоит.

Аԥыза-министр ихаҭыԥуаҩ, аекономика аминистр Кристина Озган Урыстәылатәи Афедерациа аекономикатә ҿиара аминистр ихаҭыԥуаҩ Дмитри Вольвач напхгара зиҭо урыстәылатәи аделегациа алархәны имҩаԥысраны иҟоу аусуратә еилатәара аҽазыҟаҵара шымҩаԥысуа атәы еиҭалҳәеит. Урыстәылатәи аделегациа Аԥсныҟа иаараны иҟоуп рашәарамза 13 азы.