Аҟәа. Рашәарамза 13, 2024 шықәса. Аԥсныпресс. Рашәарамза 13 рзы Аԥсны Жәлар Реизара-Апарламент адепутатцәа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа иадҳәалоу аусмҩаԥгатәқәа рылахәхара аҳәаақәа ирҭагӡаны Аԥсны Жәлар Реизара-Апарламент Аиҳабы Лаша Ашәбеи Ареспублика Ҭаҭарсҭан Аҳәынҭхеилак ахантәаҩы Фарид Мухаметшини реиԥылара мҩаԥысит.
Аиԥылара рхы аладырхәит Аԥсны Жәлар Реизара-Апарламент Аиҳабы ихаҭыԥуаҩ Асҭамыр Аршба, акультуреи аҿари аспорти русқәақәа рзы апарламенттә Еилакы ахантәаҩы Венори Бебиа, аграртә политикеи аԥсабаратә ресурсқәеи аекологиеи рзы апарламенттә Еилакы ахантәаҩы ихаҭыԥуаҩ Демур Гогиа, Аԥсны Аҳәынҭқарра Амилаҭтә олимпиатә Комитет апрезидент Валери Аршба.
Аиԥылараҿы адепутатцәа ареспублика Аԥсни Ареспублика Ҭаҭарсҭани рыбжьара традициала ишьақәгылахьоу аимадарақәа иылалцәажәеит, убри аан Аԥсны-урыстәылатәи астратегиатә еидгылара аҳәаақәа ирҭагӡаны аҩ-республикақәа ирыбжьоу асоциал-економикатәи агуманитартәи аусеицура анаҩстәи рырӷәӷәара азы аҩ-ганк иреиҳаӡоу анапхгаратә усбарҭақәа русеицура иаҵоу аҵакы ахадара инаҵшьны иазгәарҭеит.
Лаша Ашәба Фарид Мухаметшин Ҭаҭарсҭан, иҳараку аспорттә форум алахәхаразы иааз Аԥсны аделегациа ахь иаарԥшыз ахшыҩзышьҭеи асасдкылареи рзы иҭабуп ҳәа еиҳәеит, Аԥсныҟа ааԥхьарагьы ииҭеит. Аиԥылара ахыркәшамҭаз Лаша Ашәбеи Фарид Мухаметшини агәаларшәагатә ҳамҭақәа еимырдеит.
