Иахьа имҩаԥысыз абри азҵааразы аилацәажәарақәа ирылахәын Аҳәынҭқарра Ахада Апарламент аҿы есымшатәи ихаҭарнак Баҭал Аиба, Иреиҳаӡоу аӡбарҭа ахантәаҩы Саида Быҭәԥҳа, Аконституциатә реформазы акомиссиа алахәылацәа Баҭал Табаӷәуа, Гиви Габниа, Асҭамыр Ҭаниа, Олег Папасқьыр.

Аконституциатә закәан апроект иазԥхьагәанаҭоит:

– Ареспублика Аԥсны аминистрцәа Реилазаара – Аԥсны Ахада ила ишьақәгылахо аколлегиалтә усбарҭа аԥыхра;

– Аминистрцәа Реилазаара аԥыхра аԥыза-министри аԥыза-министр ихаҭыԥуаҩцәеи рмаҵураҭыԥқәа раԥыхрагьы ацлоит;

– Апарламент ақәыршаҳаҭны аминистрцәа рмаҵурақәа рахаргылара;

– Зыдгалара мҩаԥысуа азакәан апроект аҿы Аҳәынҭқарра Ахада Апарламент аужьҭреи Апарламент ахь алхра ҿыцқәа рылаҳәареи рзы азин иоуеит адепутатцәа ирыдгалоу аминистрцәа ркандидатурақәа хынтә мап анырцәырклак ашьҭахь амаҵурақәа 1/3 рыхәҭа ҭацәны иаанхазар;

– Убри инамаданы, азакәан апроект Апарламент ахь алхрақәа рымҩаԥгара арыцхә алхра аԥҟара шьақәнаргылоит;   

– Аҳәынҭқарра Ахада ареспублика анагӡаратә мчра ацентртә усбарҭақәа реилазаара ашьақәырӷәӷәаразы азинмчы иҭара;

 – Иара убас Аҳәынҭқарра Ахада ихаҭыԥуаҩ изинмчқәа хаз игоу закәанла рышьақәырӷәӷәара.

Азакәан апроект иааизакны адепутатцәа ақәшаҳаҭхеит, аха убри аан уи анаҩс аус адулара шаҭаху, насгьы уи аиҭакрақәак ралагалара шахәҭоу азы агәаанагарақәа рҳәеит. Апарламент иарбоу азакәан апроект аус адулара иацнаҵоит.