Ачынуаҩ игәаанагарала, иқәыргылаз ахыдҵақәа рынагӡара аҿы иԥхьагылоуп Гәылрыԥшь араион инаркны Очамчыра араион аҟынӡа.  Араҟа адҵақәа реиҳарак нарыгӡахьеит. Иарбоу аҵакыра аҿы аплиажқәа раартра рашәарамза 10 рзы иазԥхьагәаҭоуп.

«Гагра азԥхьанҵа иарбаз пунктгьы нагӡамкәа иаанхеит. Афон Ҿыци Пицундеи ақалақьқәа рҿы ишьақәдыргылахьеит аӡсараз азин ахьынӡаҟоу аҳәаа, ихҵоуп аӡҳәаарбагақәа.   Аҟәа ақалақь аҿы амшын аҵа гәаҭаны идрыцқьеит, мчыбжьык ала аӡҳәаарбагақәа хҵахоит», - ҳәа иазгәеиҭеит иара.

Ҭенгиз Сабуа еизаз иргәалаиршәеит 2002 шықәсазы аӡаҿы азинеилагарақәа рыԥхьырҟәҟәааара азы ахарԥсатә санкциақәа шалагалаз:

«Ҳара ашықәси-ашықәси рыбжьара аӡиас амшын иахьалало аҭыԥқәа рҿы аҽыкәабара шыҟамло аҳәара ҳаҿуп. Иҟан имаҷымкәа амашәыр хҭысқәа, Кьалашәыр аӡиас амшын иахьалало ауаа аӡы иагон.  Иҟан зеиқәырхара алыршаз, аха иҭахазгьы ыҟоуп. Џьоукы-џьоукы ауаа арыжәтә ыжәны аӡы иҭалоит,  мамзаргьы амшын анеисуа рҽыркәабоит. Ҳара азин нагӡаны иҳамоуп ас еиԥш азинеилагаҩцәа 2 нызықь мааҭ рҟынӡа ахараԥса дыршәара Иара убас ҳара араионқәеи ақалақьқәеи иахьрыҵанакуа аплиажқәа рзы аҭакԥхықәра зду урҭ рхадацәагьы ахараԥса дҳаршәарц азин ҳамоуп. Усҟан ахараԥса аицҵалыҵ 18 нызықь мааҭ рҟынӡа инаӡоит», - ҳәа иҳәеит иара.

Иара убас Ҭенгиз Сабуа хәы-шықәса раԥхьа Аԥсны аӡытә ҵакырақәа зегьы рҿы иааизакны 49-ҩык ҭахеит ҳәа иазгәеиҭеит. Убас 2020 шықәсазы – ԥшьҩык, 2001 шықәсазы  – 20-ҩык, 2022-тәи ашықәс азы   – 13-ҩык , 2023-тәи ашықәс азы – 12-ҩык ауаа.  

«Ҳгәыӷуеит, 2024 шықәсазы аӡҭаларатә сезон амашәыртә хҭысқәа рыда имҩаԥысып ҳәа», - иҳәеит иара.