Аҟәа. Рашәарамза 6, 2024 шықәса. Аԥсныпресс. Аԥсны анапылампыл Афедерациа Актәи апрезидент Едуард Ԥлиа игәалашәара иазкны анапылампыл азы ахацәа рыбжьара Иаарту атурнир алагеит аԥшьаша, Аҟәа ақалақь, Сергеи Багаԥшь ихьӡ зху аспорт Ахан аҿы.
Атурнир рхы аладырхәуеит Аахыҵ Уаԥстәыла, Лугансктәи Жәлартә Республика, Ҭҟәаԥс, Невинномыск, Гагра, Аҟәа ақалақьқәа рҟынтәи ф-командак, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.
Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба атурнир алахәылацәа аԥсшәа реиҳәеит, дрыдныҳәалеит.
Атурнир аартра иазку аныҳәатә церемониа рхы аладырхәит Аԥсны Амилаҭтә олимпиатә Комитет ахантәаҩы Валери Аршба, Аԥсны анапылампыл Афедерациа апрезидент Аслан Ҭырқьба, Едуард Ԥлиа иԥа, Гал араион ахада Константин Ԥлиа.
Анаҩс атурнир алахәылацәа рҿаԥхьа иқәгылеит Аҳәынҭқарратә ахәыҷтәы хореографиатә ансамбль «Абаза».
Аицлабрақәа реиҿкаара рхахьы иргеит Аԥсны аҿари аспорти русқәа рзы Аҳәынҭқарратә Еилаки Аԥсны анапылампыл азы Афедерациеи.
Едуард Константин-иԥа Ԥлиа (26.08.1937 – 25.07.2012шш.) – аԥснытәи аҳәынҭқарратәи ауаажәларратәии аусзуҩ, Ареспублика Аԥсны аимадара ԥыхьатәи аминистр, Аԥснытәи АССР зҽаԥсазтәыз аимадаҩ, Аҳәынҭқарратә еилазаара «Аԥсныеимадара» ԥыхьатәи анапхгаҩы, Ареспублика Аԥсны анапылампыл Афедерациа Актәи апрезидент, ҳаҭыр зқәу Аԥсны аспорт азҟаза, «Ахьӡ-Аԥша» III аҩаӡара аорден акавалер.
