Аҟәа. Рашәарамза 5, 2024 шықәса. Аԥсныпресс. Рашәарамза 4, 2024 шықәса рзы Урыстәыла Апрокуратура Хада аҿы «Аԥсны Аҳәынҭқарреи Урыстәылатәи Афедерациеи ашәахтәии абиуџьеттәии азакәанԥҵарақәа рынагӡара азы апрокурортә хылаԥшра аусхкы аԥышәа» атема ала астол гьежь мҩаԥысит.
Ари ҳтәылақәа рыпрокуратура Хадақәа рыбжьара 2023-2024 шықәсқәа рзы аусеицура апрограмма назыгӡо аусмҩаԥгатәқәа ируакуп.
Аԥсны Аҳәынҭқарра Апрокуратура Хада аофициалтә саит аҟны иҟоу адыра ала, Аԥсны Урыстәылеи Рхылаԥшырҭақәа апрокурорцәа рзинмчы, ашәахтәии абиуџьеттәии азакәанԥҵара анагӡара аганахьала апрокурорттә усура аԥышәа иалацәажәеит.
Убас, аԥснытәи аделегациа аҳәаанырцәтәи рколлегацәа Ареспублика Аԥсны ашәахтәии абиуџьеттәи закәанԥҵара апрокурорттә хылаԥшра анагӡара аҿы ихадоу ахырхарҭақәас иҟоу рзеиҭарҳәеит.
Ахәҭакахьала, урыстәылатәи аделегациа ахаҭарнакцәа ртәылаҿы иҟоу аҳәынҭқарратә аахәарақәа русхкы аҿы аҳәынҭқарратә контрактқәа рыбжьаҵараан апрокурорттә хылаԥшра, урыстәылатәи амилаҭтә проектқәа рынагӡара аганахьала апрокурорттә хылаԥшра, уҳәа еиҿызкаауа азакәанԥҵара иалацәажәеит, иара убас апрокурорттә зхьаԥшра ахархәара аԥышәа иазааҭгылеит.
Имҩаԥысыз аиԥылара Аԥсни Урыстәылеи рыпрокуратурақәа реимадареи русеицура зырӷәӷәо акыр зҵазкуа даҽа шьаҿакны иҟалеит. Аиԥылара аихшьаалақәа рыла, аганқәа аԥышәеимадара ацҵара шхымԥадатәиу азгәарҭеит.
Адгәыр Агрба инапынҵала, аԥснытәи аган аҟынтәи аиԥылара рхы аладырхәит азакәанԥҵара анагӡара ахылаԥшра азы аҟәша аиҳабы ихаҭыԥуаҩ Л. А. Тарба, азакәанԥҵара анагӡара азы аусбарҭа аганахьала – аспециалистцәа рыҟәша аиҳабы А. М. Григориани апрокурор Г. Л. Адлеибеи, иара убас Гал араион апрокурор А. З. Оҭырба.
Урыстәыла аганахьала аиԥылара рхы аладырхәит Урыстәылатәи Афедерациа Апрокуатура Хада абиуџьеттә закәанԥҵара анагӡара ахылаԥшра азы аҟәша аиҳабы К. А. Ефимова, Урыстәылатәи Афедерациа Апрокуратура Хада аекономика аусхкы аҿы азакәанԥҵара анагӡара ахылаԥшра аҭара азы аусбарҭа апрокурор еиҳабацәа С. Н. Стрекини А. Г. Ариухини.
