Аҟәа. Рашәарамза 5, 2024 шықәса. Аԥсныпресс. Аԥсны аҿари аспорти русқәа рзы Аҳәынҭқарратә Еилакы ахантәаҩы ихаҭыԥуаҩ Беслан Карчаа Аԥсныпресс акорреспондент диҿцәажәо Аԥснытәи аспортсменцәа Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа 14 спорттә хкы рыла рылахәхара атәы далацәажәеит.
Аԥснытәи аделегациа аилазаараҿы иҟалоит 102-ҩык, урҭ рахьынтә 63 - ҩык спортсменцәоуп.
Беслан Карчаа аусмҩаԥгатә апланқәа дрылацәажәеит:
«Ареспублика Аԥсны аделегациа рашәарамза 11 рзы Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәа Рыхәмаррақәа рылахәхаразы Ҭаҭарсҭан иҟалоит. Аделегациақәа рнапхгаҩцәа реиԥылара уи аԥхьа мышкы шыбжьоу имҩаԥысуеит».
Беслан Карчаа иажәақәа рыла, аԥснытәи аспортсменцәа - фиџьитал-шьапылампыли фиџьитал-мҵәышәмпыли реиԥш иҟоу иҿыцу аспорт хкқәа рыла аицлабрақәагьы рхы аладырхәраны иҟоуп. «Раԥхьа акомпиутер аҿы ахәмаррақәа мҩаԥгахоит, анаҩс аплошьадка аҿы»,- ҳәа иазгәеиҭеит иара. Иара убас имҩаԥгахоит асамбо, аӡиудо, атлетика лас, аԥкьаҭмпыл, зхы иақәиҭу аиқәԥара, амаҟақәа рыла аиқәԥара, абокс, ашахматқәа, карате, ушу, уҳәа рыла аицлабрақәа», -ҳәа адырра ҟаиҵеит Беслан Карчаа.
Иара агәыӷра шимоу иҳәеит ҳтәылауаа рҟынтәи адгылара шыҟало азы, насгьы ҳтәыла ас еиԥш иҟоу амҽхак змоу аицлабрақәа рылахәхара иаҵоу аҵак дуӡӡа азгәеиҭеит:
«Ари ҳара ҳзы Аолимпиатә хәмаррақәа ирҩызоуп, - иарбоу Ахәмаррақәа официалла рылахәхара атәы шьақәдырӷәӷәеит 97 тәыла. Аԥсны апарад аанартуеит, избан акәзар алфавит ала ҳара раԥхьатәи тәыланы ҳгылоуп. Абираҟ икуеит зыхьӡ нагоу ҳшьапылампыласҩы Ахрик Цәеиба», - ҳәа иҳәеит Беслан Карчаа.
Уи иара убас иазгәеиҭеит аспортсменцәа афинанстә цхыраара шриҭаз Аԥсны Аҳәынҭқарра Ахада Аслан Бжьаниеи атәыла аԥыза-министр Алеқсандр Анқәаби.
