Ашкол анапхгараҭареи иара аҵаҩцәеи Аԥсны Аҳәынҭқарра Ахада даара ибзианы дрыдыркылеит. Аслан Бжьания абаза бызшәа аурок далатәеит, аҵаҩцәа дрыҿцәажәеит, иара убас ҳаҭыр зқәу асасцәа рышәҟәы аҟны анҵамҭа аанижьит: «Ҳашьцәа Абазаа! Ишәдыруаз, Аԥсны анапхгара есымша ҳаимадара арӷәӷареи аҿиареи рзы иалшо зегьы шыҟанаҵало! Зегьы зымчу дышәхылаԥшааит! Илԥха-игәыԥха шәымазааит! Аԥсны Аҳәынҭқарра Ахада Аслан Бжьаниа».  

Ашкол аҵаҩцәа Аԥснынтәи иааз асасцәа рзы аконцерттә программа дырхиеит.

Аԥсны Аҳәынҭқарра Ахада ашкол анапхгараҭареи аҵаҩцәеи ироуз адкылара бзиа азы иҭабуп ҳәа реиҳәеит.  

Аслан  Бжьаниа иқәгылараҿы иазгәеиҭеит:  «Ҳаҭыр зқәу ҳашьцәа, ҳаҳәшьцәа! Сара даара гәахәарала исыдыскылоит шәареи ҳареи иахьатәи ҳаиԥылара. Даҽазныкгьы агәра сгеит шәреспублика хра злоу аҿиара амҩа ишану. Аԥсуааи абазааи жәларык ҳауп,  ҳаиашьаратә еимадара арӷәӷәареи арҿиареи рзы аусура ҳазҿлымҳауп, жәаҳәарадагьы ҳагьазхиоуп».

Анаҩс Аслан Бжьаниеи аԥснытәи аделегациеи аул Хабез  аҿы Леон иорден занашьоу Мусса Дауров иҳаҭгәын иаҭааит.