Аҟәа. Рашәарамза 2, 2024 шықәса. Аԥсныпресс. Ахәыҷқәа рыхьчара Жәларбжьаратәи Амш инарҭбааны иазгәарҭеит Очамчыра ақалақь аҿы.
Ахәыҷқәа рыхьчара Жәларбжьаратәи Амш Очамчыра ақалақь аҿы азгәаҭара иалагеит «илахҿыху астартқәа» рыла. Анаҩс ахәыҷқәа ирзыԥшын акатер иақәтәаны амшын ала аныҟәара, иара убас шаҟа узыфо аршәы.
Амш аҩбатәи азыбжазы ақалақь Ахадара ахыбра аҿаԥхьа иҟоу апарк аҿы аныҳәа зызкыз зегьы ирзеиҿкаахеит аинтерес зҵоу аконкурсқәеи аҟаза иклассқәеи. Ахәылбыҽханӡа изҭахыз зегьы ахыци ахәымпали рыла ахысразы алшара рзаԥҵан.
Аныҳәа рхы аладырхәит ақалақь ауааԥсыра рыдагьы уи иаҭааз асасцәагьы. Аныҳәатә гәалаҟазаара ахәыҷқәа рҟынтәи адуцәагьы рахь ииасит.
Аныҳәатә программа хдыркәшеит аниматорцәа рықәгыларақәа рыла — ахәыҷтәы фильмқәа рфырхацәа рықәгыларақәа, иԥшӡаны еиҿкааз ашоу, иара убас ашәахтә гәырҿыхара.
Ахәылбыҽха, анылашьца, Очамчыратәи ажәҩан арлашеит аныҳәатә феиерверк.
