Ԥшьымз ирылагӡаны аа-еиԥыларак еиҿкаахоит. Ахәыҷқәа ажәытә аԥсуа жәлар рқьабзқәеи рҵасқәеи рҵоит, аԥсуа жәлар рмузыкатә инструментқәа рыла ахәмаршьа, ахыци ахәымпали рыла ахысшьа, ажәытә аԥсуа кәашарақәа рыкәашашьа, амилаҭтә орнамент заку аилкаара, уҳәа хра злоу адыррақәа маҷымкәа ироуеит.
Апроект аиҿкааҩцәа агәра ганы иҟоуп апроект аҳәаақәа ирҭагӡаны аусмҩаԥгатәқәа рҭаара алахәылацәа ргәалашәараҿы ашьаҭа бзиа шааннажьуа.
Аиԥыларақәа аинтерес зҵоу аекскурсиақәа рахь ацарала аҟаза-иклассқәа раҳасабала имҩаԥыслоит. Ареспублика еиуеиԥшым араионқәа рҟынтәи аҿар еибадырыр рылшоит, аҩызцәа ҿыцқәа дырҳар, аԥышәеимадара рыбжьарҵар ауеит, иара убас апрофессионалцәа ирзыӡырҩыр ҟалоит.
Апроект раԥхьатәи усмҩаԥгатәны иҟалеит аԥсуа жәлар рмузыкатә инструментқәа ирызку алекциа амҩаԥгара. Амузыкатә школқәа, Аҟәатәи амузыкатә ҵараиурҭа аҵаҩцәа рҿаԥхьа дықәгылеит Аԥсны Аҳәынҭқарратә жәлар рмузыкатә инструментқәа рансамбль асахьаркыратә напхгаҩы, акультура зҽаԥсазтәыз аусзуҩ Денис Арухаа.
Аинтарактивтә, ахәмарратә формат ала аспикер ахәыҷқәа ирызнеигеит аԥсуа жәлар рмузыкатә инструментқәа рҭоурыхи рҷыдарақәеи рзы адыррақәа, ахәыҷқәа урҭ рыла ахәмарразы алшарагьы риҭеит.
