Аҟәа. Лаҵарамза 22, 2024 шықәса. Аԥсныпресс. Аԥсны иҟоу Урыстәыла аус ацура азы Ахаҭарнакра Аԥсны аусура ианалага инаркны есышықәса аславиан ҩыреи акультуреи рымш азгәанаҭоит.
Лаҵарамза 24 рзы иазгәарҭо ари Амшныҳәа аламҭалазы, Аԥсны иҟоу Урыстәыла аус ацура азы Ахаҭарнакра Акультура-рккаратә центр аҟны Аҟәа ақалақь аҿы иҟоу ашколқәа ԥшьба рҵаҩцәа рыбжьара адгалара-аконкурс мҩаԥгахеит. Аславиан ҩыра ахыҵхырҭа аҭоурых азы еицлабуан Аҟәатәи 4-тәи, 6-тәи, 10-тәи, 15-тәи ашколқәа рҵаҩцәа.
Ашколқәа еизгоу ркомандақәа аславиан ҩыра ашьақәгылара аҭоурых азы ирымоу адыррақәа рыла еицлабуан.
Аконкурстә еицлабрақәа ирылагаанӡа акомандақәа зегьы традициала ишаԥу еиԥш ачеи аџьыкеи, ашәаҳәарақәеи акәашарақәеи адныҳәаларақәеи аҭынчреи анасыԥи аизҳазыӷьареи рзы азеиӷьашьарақәеи зцыз акостиумертә музыка-театралтә қәгыларақәа еиҿыркааит. Аинтерактивтә викторина азҵаарақәа аҭӡы аҿы икнаҳаз аекран аҿы ианылон, иҩны иҟарҵоз аҭакқәа ахәшьара арҭон Ахаҭарнакра аусзуҩцәеи Аҟәа ақалақь Ахадара аҵара Аусбарҭа амаҭәартә методикатә еиҿкаарақәа рнапхгаҩцәеи злахуз аӡбаҩцәа реилазаара. Аусмҩаԥгатә амҩаԥгаҩ иҟалҵоз ахцәажәарақәа рҟынтәи акомандақәа ирылахәызи азгәыбылҩцәеи асасцәеи ауаажәлар аиашахаҵаратә динхаҵара рылазырҵәоз иԥшьоу ацҳаражәҳәаҩцәа Кирилли Мефодии рҭоурыхи Аԥсни Урыстәылеи аиашахаҵаратә традициақәеи ирызкны акыр аинтерес зҵоу адыррақәа роуит.
Акомандақәа ирылахәыз зегьы Аԥсны иҟоу Урыстәыла аус ацура азы Ахаҭарнакра аҟынтәи аҳаҭыртә шәҟәқәеи аҳамҭақәеи ранаршьеит. Агәалашәаратә ҳамҭақәеи аурыс классикцәа рышәҟәқәа ранашьахеит ажиури аилазаараҿы иҟаз.
Аконкурс иалахәызи азгәыбылҩцәеи асасцәеи рнапқәа еибаркны аурыс жәлар рашәақәа рҳәеит, алафқәа, асамарҟәыл еибырҳәеит, иара убри ала зеиӷьаҟам аныҳәатә гәалаҟазаара аԥырҵеит.
Абри азы адырра ҟанаҵоит Аԥсны иҟоу Урыстәыла аус ацура азы Ахаҭарнакра апресс-маҵзура.
