Аҟәа. Цәыббрамза 6, 2022 шықәса. Аԥсныпресс. Нанҳәамза 29 инаркны цәыббрамза 4 аҟынӡа Москва ақалақь аҿы 9-10 шықәса зхыҵуа аҷкәынцәа рыбжьара имҩаԥысуан аԥкьаҭмпыл азы Урыстәылатәи атурнир «Аԥкьаҭмпыл азы Москватәи Академиа Ахраҿа». Уи ихы алаирхәит Аԥснытәи аспортсмен қәыԥш Нестор Цужба, ҳәа иаанацҳауеит Аԥсны аспорти аҿари русқәа рзы аҳәынҭқарратә Еилакы апресс маҵзура.
«Аҩбатәи аномер ала иқәгылоз Нестор Цужба ԥшь-қәгыларак дырхысны афинал аҟынӡа днаӡеит. Араҟа уи акыр имариамыз аиндаҭлараҿы Хабаровск аҟынтәи аԥкьаҭмпыласҩы диаԥасны атурнир аҿы аиааира игеит», - ҳәа еиҭалҳәеит аспортсмен изыҟаҵаҩ, Аԥсны Ареспубликатә ԥкьаҭмпылтә школ адиректор, аԥкьаҭмпыл азы Аԥсны аспорт азҟаза Елизабет Акәыциа.
