Акатаракта, аглаукома, абла акаҭара, уҳәа абла ачымазарақәа змоу апациентцәа ргәаҭара хәыда-ԥсада имҩаԥыслоит. Ареспублика ауааԥсыра иарбоу акомплекс анаауа арыцхә азы заанаҵы адырра рыҭахоит.
Атәыла агәабзиарахьчара аминистр Едуард Быҭәба напхгара зиҭо Ахылаԥшырҭа аҿы урыстәылатәи амедикцәа раара азы иахәҭоу аҽазыҟаҵарақәа зегьы мҩаԥгахоит ҳәа инаҵшьны иазгәеиҭеит. «Сгәы иаанагоит Очамчыреи Ҭҟәарчали рыла ҳалагап ҳәа. Уи аԥышәатә проектқәа ҩба ракәхоит, анаҩс зыблабара агәаҭара азы алшара змам ауааԥсыра ахьырацәоу, ас еиԥш адиагностика аиҳарак иахьхымԥадатәиу егьырҭ араионқәагьы ҳархысуеит», - ҳәа иҳәеит Едуард Быҭәба.
Ахәҭакахьала, Олег Шаталов Аԥсны Аҳәынҭқарра агәабзиарахьчара Аминистрра аус ацура ихырҳаганы, ихәарҭаны ишымҩаԥысуа азы агәрагара имоуп ҳәа инаҵшьны иазгәеиҭеит.
