1978 шықәсеи 1989 шықәсеи рзы – активла Аԥсны имҩаԥысуаз аполитикатә қәгыларақәа, аԥсуаа рмилаҭ-хақәиҭратә қәԥара далахәын. Аԥсуа жәлар рмилаҭтә хақәиҭратә қәԥара активла алахәхаразы Константин Озган Қырҭтәыла анаԥхгара аԥшьгарала иааникылоз Гәдоуҭатәи апартиа араионтә комитет актәи амаӡаныҟәгаҩ имаҵураҭыԥ аҟынтәи ихы дақәиҭыртәит.
1989 шықәсазы еицҿакны Гәдоуҭатәи араионтә анагӡаратә комитет ахантәаҩыс далырхит. Иара убасҟанҵәҟьа, Қырҭтәылатәи Асоветтә Социалтә Республика Апрокуратура аԥшьгарала Асовет Еидгыла Апрокуратура ала аполитикатә хҭысқәа ралахәхара азы Константин Озган иганахьала ашьаусеилыргара хацыркхоит.
1989-1994 шш. – Кавказ ашьхарыуа жәларқәа Рконфедерациа активла иҽалаирхәуеит; Кавказ Ахьыԥшымра Акомитет (КНК) кавказтәи аилазаарақәа Ркомитет ахантәаҩыс дыҟан.
1991 - 1996 шш. – Иреиҳаӡоу Асовет – Ареспублика Аԥсны Апарламент адепутат; Апрезидиум алахәыла, асоциал-економикатә ҿиара азы Акомитет ахантәаҩы.
1992 – 1993 шш. Аԥсны жәлар Рџьынџьтәылатәи еибашьра аан атәыла ахақәиҭраз илагала ду алоуп – Атәылахьчара Аҳәынҭқарратә еилакы далахәылан. Нхыҵ Кавказынтәи, Урыстәыла аказакра, иара убас хара аҳәаанырцәынтәи хатәгәаԥхарала еибашьра иаауаз рыбжьара мҽхакы ҭбаала аусура мҩаԥигон.
Аԥсны анапхгара рнапынҵала изныкымкәа Нхыҵ-Кавказтәи ареспубликақәа рнапхгаҩцәа дырԥылахьан.
Алада Урыстәыла аказакреи Кавказ ашьхарыуа жәларқәа Рконфедерациеи рыбжьара Аиқәшаҳаҭра абжьаҵара аиҿкааҩыс дыҟан. (1993 ш.).
1996 - 1997 ш. – Ареспублика Аԥсны адәныҟатәи аусқәа рминистрс дыҟан.
1997 - 1999 шш. – Аԥсны аԥыза-министр актәи ихаҭыԥуаҩыс, аекономика аминистрс дыҟан.
Ԥхынҷкәынмза, 1999 шықәса инаркны 2002 шықәсанӡа – Аԥсны Аҳәынҭқарратә шәахтә маҵзура ахантәаҩыс дыҟан.
2002 шықәса инаркны 2007 шықәсанӡа – Аԥсны Апарламент Аиҳабы ихаҭыԥуаҩыс дыҟан.
2009 шықәса инаркны иԥсҭазаара аҵыхәтәантәи ашықәсқәа рҟынӡа ареспублика абыргцәа Рхеилак дахагылан.
Константин Озган иԥсҭазаара далҵит 2016 шықәсазы.
Ианашьоуп аорденқәа «Аҳаҭыр Адырга» ( «Знак Почета»), «Ахьӡ-Аԥша» I, II аҩаӡарақәа, ԥсрашьҭахь ианашьан Леон Иорден. ***
