Аҟәа. Лаҵарамза 13, 2024 шықәса. Аԥсныпресс. С. Ҷанба ихьӡ зху Аԥснытәи аҳәынҭқарратә драматә театр Башкортосҭан имҩаԥысраны иҟоу амилаҭтә театрқәа рфестиваль ахы аланархәуеит.
Лаҵарамза 16 – 23 рзы имҩаԥысраны иҟоу VIII амилаҭтә театрқәа Жәларбжьаратәи рфестиваль «Туганлык» Уфа ақалақь аԥҵара 450-шықәса ахыҵра иазкуп.
Лаҵарамза 21 рзы Мажит Гафури ихьӡ зху Башкиртәи академиатә театр асцена аҿы Аԥснытәи атеатр башкиртәи ахәаԥшыҩ иднагалоит Ф. Достоевски ироман «Ауаа ӷарқәа» («Бедные люди») амотивқәа рыла иқәыргылоу В. Семеновски испектакль «Ловелас».
«Туганлык» 1991 шықәсазы Ареспублика Башкортосҭан акультура Аминистрра аԥшьгарала Уфа ақалақь аҿы аҭоурыхтәии акультура-бызшәатәи еиԥшызаара рыла ишьаҭарку атеатралтә культура, аиҩызара, аимабзиаратә еизыҟазаашьақәа ареспубликақәеи атиурктә дунеи рысценатә ҟазара аныҳәа аҳасабала еиҿкаан.
2024 шықәсазы Афестиваль раԥхьаӡа акәны амилаҭтә теарқәа Рфесттиваль ахьӡ аманы имҩаԥгахоит. Уаанӡа уи «атиуркбызшәатә театрқәа рфестиваль» ҳәа ахьӡ ахын уажәы уи аформат аҽарҭбаауеит.
Афестиваль афиша аҿы – аспектакльқәа 14, урҭ рахьынтә ҩба – аконкурснҭыҵтәиқәоуп: Иҷыдоу асас иаҳасабала Афестиваль ахь ааԥхьара зауз Мажит Гафури ихьӡ зху Башкиртәи академиатә драматә театри А. С. Пушкин ихьӡ зху Псковтәи атеатри (Урыстәыла Амилаҭтә драматә театр – Алеқсандртәи атеатр) аспектакльқәа.
Аконкурстә программа аҿы иҟоуп – Ҭаҭарсҭан, Ҟазахсҭан, Кыргысҭан, Нхыҵ Уаԥстәыла- Аланиа, Чувашиа, Калмыкиа, Аԥсны, Тува, Даӷьсҭан, Мари Ел рҟынтәи атеатралтә коллективқәа рыспектакльқәа.
Афестиваль аҳәаақәа ирҭагӡаны Урыстәыла амилаҭтә театрқәа Рассоциациа ацхыраарала Урыстәыла Амилаҭтә драматә театр – (Алеқсандртәи атеатр) аҟынтәи аҵарадырратә программа азԥхьагәаҭоуп. Иара убас иазԥхьагәаҭоуп есыхәылбыҽха имҩаԥгахо актиортә клубқәа, Уфа аҭыԥ ԥшӡарақәа рахь аекскурсиақәа, еицырдыруа атеатр аусзуҩцәа аинтерес зҵоу рԥыларақәа.
Аспектакльқәа Мажит Гафури ихьӡ зху Башкиртәи академиатә драматә театри М. Карим ихьӡ зху Уфимтәи аҳәынҭқарратә татартә театри «Нур», Ареспублика Башкортосҭан Амилаҭтә қәыԥштә театри рысценақәа рҿы имҩаԥыслоит.
Афестиваль «Туганлык» аанартуеит Мажит Гафури ихьӡ зху Башкиртәи академиатә адраматә театр аспектакль «Красный паша» (Н. Асанбаев, арежиссиор А. Абушахманов).
