«Ирласны аҭакҟаҵаразы иҷыдоу аотриадқәа рҿы баша иқәнагалаз ауаа зыҟалаӡом, араҟа амаҵзура назыгӡо афицарцәа зегьы иҷыдоу аҟазшьақәа рымоуп. Аотриад ахь аусзуҩцәа маха-шьахалатәи ацәаҩашәа-мчхаратәи аҟазшьақәа рыла иалԥшааны иалххоит, урҭ зегьы реиҳа иуадаҩу, аҭакԥхықәра зду ахыдҵақәа нарыгӡоит. Урҭ ириуоуп – атерроризми аекстремизми рҿагылара, ацәгьоурақәа рыԥхьырҟәҟәаареи рҿагылареи аҭҟәацәа рхақәиҭтәреи иазку аоперациа ҷыдақәа. 

Аҵыхәтәантәи ашықәсқәа  рзы шәара аихьӡара бзиақәа аашәырԥшуеит, шәганахьала аҽԥынкылара ҳәа акгьы ыҟаӡам, аринахысгьы еиҳа ишеиӷьхо азы агәра ганы сыҟоуп»,– ҳәа инаҵшьны иазгәеиҭеит Роберт Киут.

Иахьа азинхьчаратә усбарҭақәа имҩаԥырго зымҽхак ҭбаау аоперациақәа шамахамзар Ирласны аҭакҟаҵаразы иҷыдоу аотриад аусзуҩцәа рыда имҩаԥысӡом. Иҷыдоу аотриад ас еиԥш аусура аҿы аԥышәа ду амоуп. Ирласны аҭакҟаҵаразы аотриадқәа Ахылаԥшырҭа асистема аҿы урҭ иҷыдоу рыстатус алызкааз атрадициақәеи апринципқәеи ирықәныҟоит, руалԥшьақәа хьыӡла-ԥшала инарыгӡоит, ҳәа адырра ҟаҵоуп Аԥсны Аҳәынҭқарра аҩныҵҟатәи аусқәа Рминистрра аофициалтә саит аҿы.