«Ҳара мҩабжара аанкылара ҳаздырӡом, ҳаиҩызара еиҳа-еиҳа иӷәӷәахоит, аусеицура амҽхак ессааира аҽарҭбаауеит. Иҟоуп аихьӡарақәа, убас, 2023 шықәса рзы  Архангельсктәи аобласти Аԥсни ирыбжьаз адәныҟахәаахәҭратә еикәыршара 2022 шықәса иаҿырԥшны уахәаԥшуазар жәантә еиҳахеит. Иҟоуп апотенциал бзиеи аперспективақәеи маҷымкәа», –  ҳәа иҳәеит Ваге Петросиан. Иара  иааиуа иҭааразы аҳаиреимадара «Аҟәа-Архангельск» ахархәара шаиуо азы агәыӷра шимоу иҳәеит.

Аиԥылара ахыркәшамҭаз аганқәа агәаларшәагатә ҳамҭақәа еимырдеит.

Архангельсктәи аобласт аделегациа аилазаараҿы иҟоуп Морозова Екатерина Николаи-иԥҳа – Архангельсктәи аобласт Агубернатор актәи ихаҭыԥуаҩ иреферент, Опрышко Андреи Иван-иԥа –  апкаанҵа адепартамент жәларбжьаратәии арегионбжьаратәи аимадарақәеи   Архангельсктәи аобласт Анапхгареи Архангельсктәи аобласт Агубернатор  Иусбарҭеи жәларбжьаратәи аимадарақәа  рыҟәша  аиҳабы.

Аԥснытәи аган аҟынтәи аиԥылара иалахәын Аҳәынҭқарра Ахада Иусбарҭа анапхгаҩы Абесалом Кәарҷиа, Аҳәынҭқарра Ахада Иусбарҭа анапхгаҩы ихаҭыԥуаҩ Валери Папба, Гагра араион ахада ихаҭыԥуаҩ Адамыр Цышба, Аԥсны иҟоу Урыстәыла Ацҳаражәҳәарҭа ацҳаражәҳәаҩ-абжьгаҩ Максим Литвинов.