Аҟәа. Мшаԥымза 19, 2024 шықәса. Аԥсныпресс. Аԥсны Зҽаԥсазтәыз артист Пиотр Петров 75-шықәса ихыҵра иазкыз ахәылԥаз мҩаԥысит аԥшьаша, мшаԥымза 18 рзы, Аҟәа ақалақь, С.Ҷанба ихьӡ зху Аԥснытәи адраматә театр аҿы.
Акультура аминистр аамҭала инапынҵақәа назыгӡо аиубилиар ихьӡала адныҳәаларатә цҳамҭа аалышьҭит. Уи атекс аҟны, ахәҭакахьала иазгәаҭоуп:
«Ареспублика Аԥсны акультура Аминистрреи хаҭала сара сыхьӡалеи шәиубилеи шәыдысныҳәалоит! Шәара шәравторуп ихатәроу акыр асимфониатә ԥҵамҭақәеи егьырҭ аклассикатә жанртә аԥҵамҭақәеи. Урҭ рахьынтә ирацәоуп ҳаамҭазтәи аԥсуа ҭоурых зныԥшуа. Асимфония №1 «Аԥсны», асимфониатә поема аоркестор азы «Владимир Ҳаразиа», «Аԥсуа кәашара», Кәымф Ломиа иажәеинраалақәа ирылху аа-романск, убас егьырҭ уҳәа реиԥш иҟақәоу. Шәара шәырҿиамҭақәа иҳараку азанааҭтә ҩаӡара аҿы иаԥҵоуп, урҭ аԥснытәи акомпозиторцәа иҿыцу рабиԥареи ҳаамҭазтәи аклассикатә музыка абзиабаҩцәеи рзы иҿырԥшыганы иҟалоит. Гәык-ԥсыкала ишәзеиӷьаҳшьоит зегьы раԥхьаӡа иргыланы агәабзиара, агәамч, аизҳазыӷьареи иҿыцу арҿиаратә еихьӡарақәеи!», - ҳәа илҳәеит лара.
Пиотр Петров — асоветтәии аԥснытәи акомпозитор, амузыкатә рҵаҩы, амузыкаҭҵааҩы, Аԥсны Зҽаԥсазтәыз артист, раԥхьаӡатәи аԥсуа смфониа «Аԥсны» автор.
Атеатр асцена даақәгылеит акомпозитор имузыкантцәа ицны. Ахәаԥшцәа минуҭқәак имеихьсыӷьуаз анапеинҟьарала амузыкантцәа ирԥылеит.
Аконцерт рҽаладырхәит еицырдыруа амузыкантцәа: Артак Агаджаниан (атруба), Нана Черқьезиа- сопрано, Анастасиа Курочкина-флеита, Вера Ҳагба- аскрипка. Аиубилеитә хәылԥазы аҿы иқәгылеит иара убас адирижиор Адам Ҳагба напхгара зиҭо Аҳәынҭқарратә камертә оркестр.
Ахәаԥшцәа рзы иадырҳәеит еицырдыруа арҿиамҭақәа: асимфониа №9, Караван, аскрипкеи аоркестри рзы аконцерт, Рондо, Експромт, аԥсуа темақәа рыла попуррии аромансқәеи.
Аконцерт хыркәшахеит авациақәа рыла. Ахәаԥшцәа минуҭқәак игыланы рнапы еинырҟьон. Амаестрои иколлективи ԥыҭраамҭак асцена аҟынтәи иоурыжьҭуамызт.
