8-тәи  акилометр аҿы аӷбашахатә лбаашьҭыга звольҳараку афымцацәаҳәақәа рыҵаҟа инашьҭуп, анаԥшратә плошьадка ԥҽуп, изеиԥшразаалак аусура азы ақәиҭратә усшәҟәқәеи апроекти ыҟаӡам. Аспециалистцәа ражәақәа рыла, ари аобиект анаҩстәи ахархәара залыршахом.

9-тәи акилометр аҿы игылоу аӷбашахатә лбаашьҭыгагьы убасҵәҟьа  ашәарҭадара анормақәа ирықәшәаӡом. Уажәы уаҟа аусурақәа мҩаԥысуеит.

13-тәи акилометр аҿы игылоу аобиектгьы аҿы аҭагылазаашьа убасҵәҟьа иҟоуп: аҭахкаара, аусуразы азин рызҭо аусшәҟәқәеи апроекти  ыҟаӡам иҟоуп имаҷымкәа егьырҭ аилагарақәагьы. Аспециалистцәа аобиект аамҭала аусура аанкыларазы акт еиқәдыршәеит.

Аҳәынҭстандартә аусзуҩцәа иарбоу аобиектқәа рҿы хымԥада аҭахкаагақәеи агәҽанызааратә ҭыӡҩырақәагьы шьақәыргылазароуп ҳәа иазгәарҭеит.

Аӡиа Иаҵәа ааигәара игылоу азиплаин араҟа аус зуа зегьы иреиҳау аттракционқәа иреиуоуп. Уи аҭагылазаашьа агәаҭараан аспециалистцәа аилагарақәа рымԥшааӡеит. Иара убас, араҟа анаԥшратә плошьадка ду аргылара иаҿуп.

Аӡиа Иаҵәа ахыхь даҽа ӷбашахатә лбаашьҭырҭа ыҟоуп. Уи иҳараку анаԥшратә плошьадка аҿы игылоуп, аха араҟа шамахамзар аҭааҩцәа уԥылаӡом.  Аспециалистцәа ражәақәа рыла, ари аобиектгьы ашәарҭадара анормақәа ирықәшәаӡом.

Иааизакны, агәаҭарақәа рымҩаԥгараан, аӡиа Риҵа ахь инагоу амҩала игылоу аӷбашахатә лбаашьҭрақәа быжьба рҟынтәи акоуп ашәарҭадара анормақәа ирықәшәо.  Егьырҭ аԥсҭазааразы ишәарҭоуп ҳәа иԥхьаӡоуп.

Сергеи Потиомкин ишазгәеиҭаз ала, зиплаин заҵәык ауп зхархәара ҟало, уи Аӡиа Иаҵәа аҿы игылоу ауп.

Атуризм Аминистрреи Аҳәынҭстандарти рыспециалистцәа «зиплаин» ҳәа изышьҭоу аттракционқәа рҿы уажәаԥхьагьы  изныкымкәа хыԥхьаӡара рацәала аилагарақәа аадырԥшхьан, аха, аттракционқәа рыԥшәмацәа ирырҭо азԥхьанҵақәа аиҳарак аан инагӡамкәа иаанхон.

Аҳәынҭстанданрт атехникатәи аенергетикатәи ахылаԥшра адепартамент аиҳабы Ерик Кокосқьериа, иарбоу аобиектқәа рзы уаанӡагьы азԥхьанҵақәа ҟаҵан ҳәа иазгәеиҭеит.

«Ҳара даҽазныкгьы агәаҭарақәа мҩаԥаагеит. Ишеилаҳкааз ала, уаанӡа иҟаҵаз азԥхьанҵақәа азхьаԥшра рмоуӡеит. Ҳара араион Ахадара ахь ашәҟәқәа дәықәаҳҵар ҟалап, иаарԥшыз аилагарақәа рырҽеира алыршахаанӡа иарбоу аобиектқәа русура аанкылазарц азы.  Иарбан аттракционзаалакгьы иацзароуп атехникатә усшәҟәқәа. Даҽакала иуҳәозар, иалкаау аусура ахкы азы аргылара азы азин узҭо ақьаадқәа, адгьыл ахәҭа азоужьра азы ақьаадқәа, анаҩс апроекттә ӡбамҭа еиқәыршәахоит, уи  апрофильтә усбарҭа аҿы ақәыршаҳаҭра аиуроуп. Ари аусбарҭа  – атехникатә хылаԥшра ҳәа изышьҭоу ауп. Атехникатә хылаԥшра аинспекторцәа аҭыԥ ахь инеины рхала ирбароуп аобиект Аҳәынҭстандарт анормақәа ишрықәшәо, анаҩс аобиект аусура ахацыркра азы алкаа зну аусшәҟәы рыҭара мҩаԥгахоит», – ҳәа иҳәеит иара.

Аԥсны атуризм аминистр ихаҭыԥуаҩ Асҭамыр Барцыц, Аԥсны иаауа атуристцәа ршәарҭадара, ахьарбоу атуризм Аминистрра Аԥҟара инақәыршәаны, есышықәса, акурорттә сезон алагаанӡа аттракционқәа рҭагылазаашьа агәаҭара хымԥадатәны иҟоуп ҳәа инаҵшьны иазгәеиҭеит.

«Егьырҭ амчра аусбарҭақәа аус рыцурала «зиплаин» ҳәа изышьҭоу аттракционқәа атехникатә ҭагылазаашьа анормақәа иахьынӡарықәшәо аилкааразы амониторинг мҩаԥаагоит», - ҳәа иҳәеит иара.

Планла иазԥхьагәаҭоу аттракционқәа ргәаҭара есышықәса, акурорттә сезон аламҭалазы имҩаԥысуеит.