Аҟәа араион архитектор хада Даур Кәырикба араион Ахадара аӡиас аӡышьҭра аҭрыцқьаареи ариашареи адамбақәа рыргылареи ирызку аусурақәа есышықәса, ааԥынра алагамҭазы имҩаԥнагоит ҳәа еиҭеиҳәеит. «Ас еиԥш аамҭа алхра машәыршақә иҟамлаӡеит – ааԥынра агәазы  асырӡлеира ҟалоит, усҟан аӡиас Басла еиҳа ианшәарҭоу аамҭоуп. Аԥысра апринцип ала аусура аҭахуп анаҩс иаҳзмыриашо азарал аиура ацәцара азы», – ҳәа иазгәеиҭеит иара.

Иарбоу апроект ахарџьынҵа ф-миллионк ҟынӡа итәоит. Афинансыркра араион абиуџьет ахарџь ала имҩаԥысуеит.

Аусурақәа рыплан аекологиа азы Аҳәынҭқарратә Еилакы ақәыршаҳаҭрала ашьақәырӷәӷәара мҩаԥысуеит. «Араҟа ихымԥадатәиуп ауаа аӡхыҵра рацәыхьчара анаҩсгьы аекосистема аԥырхага амҭарагьы», - ҳәа иазгәеиҭеит  Даур Кәырикба.

Басла аӡиас аӡышьҭра арыцқьара ахьынӡахымԥадатәиу атәы уи ааигәа-сигәа инхо ауаа ибзиаӡаны ирдыруеит. «Есышықәса аӡиас ауааԥсыра азарал маҷымкәа ирнаҭоит: уи анхыҵлак  анхарҭаҭыԥқәа ирыҵанакуа адгьылҵакырақәа радагьы иара аҩнқәагьы ианрыҩналозгьы ҟалон», – ҳәа иҳәеит архитектор хада.

Аусуцәа адамба ахьынӡагылазаауа атәы инҭкааны ирызҳәаӡом – зегьы еилкаау усуп, амш «агәалаҟазаара» иадҳәалоуп. «Иҟоуп адамбақәа шықәсык рҟынӡа иангылоугьы, аха иҟалалоит урҭ мызкалагьы аӡы ианаӡәӡәогьы. Басла аӡиас даара зԥан цәгьоу, иаӷьу ӡиасуп», ҳәа иҳәеит Даур Кәырикба.

Аӡиас аҿы аҟәарарӷәӷәаратә усмҩаԥгатәқәа лаҵарамза нҵәаанӡа ахыркәшара азԥхьагәаҭоуп.  Араион анапхгараҭара асырӡлеираан ааигәа-сигәа инхо ауааԥсыра излауа ала ироуа азарал армаҷра алыршаразы аусмҩаԥгатәқәа маҷымкәа инанагӡоит.