1989 - 1992 шш. ААУ аԥсуаҭҵаара акафедра аиҳабыс дыҟан, 1994 -1997 шш. – аҳәаанырцәтәи астудентцәа аҵара дырҵара азы аҟәша анапхгыҩыс дыҟан. 

Ԥыхьатәи Асовет Еидгыла ареспубликақәа рҿы еиԥш аҳәаанырцәгьы имҩаԥысуаз Жәларбжьаратәи аконгрессқәа, асимпозиумқәа, аколлоквиумқәа жәпакы рҿы ажәахә ҟаҵо дықәгылахьан.

2005 -2011 шш. Аԥсны Аҳәынҭқарра Ахада Сергеи Уасил-иԥа Багаԥшь аԥсуа бызшәеи абызшәатә политикеи рзы иабжьгаҩыс дыҟан.

1984 -1989 шш. Сариа Амҷба Д.И.Гәлиа ихьӡ зху абызшәеи алитературеи аҭоурыхи рзы Аԥснытәи Аинститут  (уажәы Агуманитартә ҭҵаарақәа Ринститут) аҿы еилагӡарала аус луан.

1969 шықәсазы Қырҭтәылатәи Асоветтә Социалисттә Республика Анаукақәа Ракадемиа абышәадырратә Институт аҟны академик Қеҭеван Ломтатиӡе лнапхгарала, «Топантәи адиалект алексика аԥсуа бызшәа алексика иаҿырԥшны» («Лексика тапантского диалекта по сравнению с лексикой абхазского языка») ҳәа атема ала афилологиатә наукақәа ркандидат ҳәа анаукатә ҩаӡара аиуразы адиссертациа лыхьчеит. 

Сариа Алеқсандр-иԥҳа – 145 инареиҳаны аҭҵааратә усумҭақәа авторс дрыман, урҭ рызкын алингвокультурологиеи алингвофольклористикеи, иара убас аԥсуа бызшәеи абаза бызшәеи рыҭҵаарақәа. Уи лыҭҵаарақәа рсериа аԥсуааи абазааи рыклассикатә фольклор иазкуп.

«Сариа Алеқсандр-иԥҳа Амҷба – лыԥсҭазаара алҵра цәыӡ дууп ауниверситет еиԥш аԥснытәи анаукатә еилазаара зегьы рзы.  Уи лгәалашәара лаша наунагӡа ҳгәаҵаҿы иаанхоит», ҳәа иазгәаҭоуп ААУ аколлектив ахьӡала инашьҭыз адышшыларатә шәҟәы атекст аҿы.