Аԥсны араионқәа рыла аихшарақәа абас ала ишьақәгылоит:
- Гал араион: ахәаԥшразы инашьҭын 16 проект, зегьы ирыхаԥшуп. Урҭ рынагӡаразы иаҭаххо ахарџь азеиԥш еицҵалыҵ 10 млн. мааҭ рҟынӡа инаӡоит;
- Ҭҟәарчал араион – ахәаԥшразы инашьҭын 26 проект, иалкаауп 24 проект. Урҭ рынагӡаразы иаҭаххо ахарџь 10 млн. мааҭ рҟынӡа инаӡоит;
- Очамчыра араион – ахәаԥшразы инашьҭын 265 проект, урҭ рахьынтә иалкаан 145 проект. Урҭ рынагӡаразы иаҭаххо ахарџь азеиԥш еицҵалыҵ 35 млн. мааҭ иеиҳауп;
- Гәылрыԥшь араион – ахәаԥшразы инашьҭын 43 проект, урҭ рахьынтә иалкаахеит 39 проект. Урҭ рынагӡаразы иаҭаххо ахарџь азеиԥш еицҵалыҵ 15 млн. 191 нызықь мааҭ рҟынӡа инаӡоит;
- Аҟәа араион – ахәаԥшразы инашьҭын 40 проект, урҭ рахьынтә иалкаахеит 30 проект. Урҭ рынагӡара азы иаҭаххо ахарџь 15 млн. мааҭ рҟынӡа инаӡоит;
- Гагра араион – ахәаԥшразы инашьҭын 11 проект, урҭ рахьынтә иалыркааит 8 проект, урҭ рынагӡара азы иаҭаххо ахарџь 9 млн. мааҭ рҟынӡа инаӡоит;
- Гуәдоуҭа араион – ахәаԥшразы инашьҭын 125 проект, урҭ рнагӡаразы ахарџьынҵа 70 млн. мааҭ рҟынӡа итәоит, иалкаан 75 проект, урҭ рынагӡаразы иаҭаххо ахарџь азеиԥш еицҵалыҵ 25 млн. мааҭ рҟынӡа инаӡоит.
Ақыҭанхамҩа аминистр иажәақәа рыла, аконкурстә комиссиа апроектқәа ралкаара иазку аусура нҭырҳәцааны инанагӡеит.
«Ҳара акомиссиа аилазаара ду зегьы аусуратә гәыԥқәа рыла еихаҳшеит, араионқәа рахь ҳцаны иҟаҵахо ацхыраара излауа ала ахықәкызаара алыршаразы азыҳәамҭақәа алазҵаз зегьы рылшамҭақәа еилаҳкаауан. Убри аан акырӡа аҵанакуеит ақыҭанхамҩа ахырхарҭақәа зегьы амҽхакра», - ҳәа иҳәеит Беслан Џьопуа. – Аԥаратә хархәагақәа разымхареи апрограмма алахәхара азы азыҳәамҭақәа алазҵаз рхыԥхьаӡара арацәареи иахҟьаны, иҳаҩсыз ашықәс азы иалаҵаз апроектқәа маҷымкәа иаанханы иҟоуп. Аҳәынҭқарра ақыҭауаа ирынаҭо ацхыраара араионқәа рҿы амикроекономика аҭагылазаашьа аиӷьтәрахь икылнагоит, иарбоу аусхкгьы аҿиара хра злоу аныррагьы анаҭап ҳәа агәыӷра ҳамоуп».
2024 шықәсазы ареспубликатә биуџьет аҟынтәи ақыҭанхамҩа аҿиара азы иазоужьыз 150 млн. мааҭ рҟынтәи ахәҭак аҵиаақәа аԥхасҭа рызҭо ахәаҷамаҷақәа рықәхра азы ахимиатә маҭәашьарқәеи араионтә Аматор-трактортә Станциақәа рзы аԥсахга хәҭақәеи амаругақәеи раахәаразы идәықәҵахоит.
