Аҟәа. Мшаԥымза 8, 2024 шықәса. Аԥсныпресс. 4 маининг-ферма ықәгоуп Очамчыра ақалақь аҿы, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Очамчыра араион аҩныҵҟатәи аусқәа Русбарҭа Аекономикатә шәарҭадара Аусбарҭеи УЭБиПК «Амшынеиқәафымцамч» аусзуҩцәа алархәны имҩаԥыргаз аоперативтә усмҩаԥгатә иалҵшәаны иаарԥшын изакәанымкәа акриптовалиута арҳара иазку аобиектқәа жәпакы.
Убас, Шьынқәба имҩала игылоу Хачаа Анатоли Руфим-иԥа иҩны аҿы ирыԥшааит 4 маининг-аппарат.
Лакоба имҩала игылоу ахатәыҩны аҿы ирыԥшааит 15 цыра аус зуаз акриптовалиута арҳара иазку аппаратқәа. Иабоу амаругақәа зтәу Кәачахьиа Роза Аполлон-иԥҳа лоуп.
Школьнаиа амҩала игылоу аҩны аҿы инхо Ҭарба Анатоли Сосо-иԥа имхын 5 аппаратк.
Кәартаа имҩала игылоу аҩны аҿы ирыԥшааит Кахетиӡе Оҭар Гьаргь-иԥа итәыз 9 цырак изакәанымкәа аус зуаз амаининг-аппаратқәа.
Зынӡа иааизакны зконфискациа мҩаԥгаз аппаратқәа рхыԥхьаӡара 33 цыра рҟынӡа инаӡоит. Урҭ зтәыз рганахьала административтә хьырхәра ауснагӡатәқәа мҩаԥгоуп.
