Аҟәа. Хәажәкырамза 30, 2024 шықәса. Аԥсныпресс. Шьҭа традициала ишышьақәгылахьоу ала, мшаԥымза 6 -9, 2024 шықәса рзы Москва ақалақь аҿы Ф.А. Искандер ихьӡ зху Аԥсны аҳәынҭқарратә аурыс драматә театр агастроль дуқәа мҩаԥыслоит.
Аурыс драматә театр Аԥсны уаҳа зда ыҟам аурыс театр ауп. Уи аԥҵан 1981 шықәсазы. 2016 шықәса инаркны атеатр иҿыцу аҿиара аетап иалалеит, иахьа уи Аԥсны атеатралтә процесс аҿы аԥхьагылара нанагӡоит.
Ԥшьымш рыҩныҵҟа ахәаԥшцәа идырбахоит аԥсуа, аурыс, аҳәаанырцәтәи алитература арҿиамҭақәа рыла иқәыргылоу иреиӷьу аспектакльқәа фба. Урҭ рхыԥхьаӡараҿы иҟоуп «Ишьаарҵәыроу ачара» Ф. Г. Лорки, «Софичка» Ф. Искандер – аспектакль арбара ашәҟәыҩҩы ииубилеи азгәаҭара иадҳәалоуп.
Аспектакльқәа «Ашәахәақәа рыҩныҵҟа» («В лучах» ) (мшаԥымза 6, асааҭ 14:00 рзы), «Ахаҵа ԥшӡа» («Красавец мужчина») ( мшаԥымза 6, асааҭ 19:00 рзы), «Ацынҵәарах» («Последний из ушедших»), «Аметод» ( «Метод» ) - (мшаԥымза 7 асааҭ 19:00 рзы) Атеатралтә центр «На Страстном» асценақәа рҿы имҩаԥыслоит. (аметро «Пушкинская», «Тверская», «Чеховская»).
Аспектакльқәа «Софичка» (мшаԥымза 8, асааҭ 19:00 рзы), «Ишьаарҵәыроу ачара» («Кровавая свадьба») (мшаԥымза 9, асааҭ 19:00 рзы) имҩаԥысуеит Москватәи атеатр «Et Cetera» (аметро «Чистые пруды», «Тургеневская»).
Фазиль Искандер ихьӡ зху идуу москватәи агастрольқәа мҩаԥысуеит Зҭакԥхықәра Ҳәаақәҵоу Аилазаара «Мистраль Трейдинг» иҟанаҵо адгылареи, иара убас «Москватәи Аԥсуа Диаспора» ахада Беслан Агрба хаҭала иҟаиҵо ацхыраареи атеатр аофициалтә партниорс иҟоу амобилтә еимадара Аилазаара «А-Мобаил» ацхыраареи ирыбзоураны.
